Bakı. Trend:
"Barselona" futbolçular Daniel Olmo və Pau Viktorun qeydiyyatı ilə bağlı rəsmi açıqlama verib.
Trend xəbər verir ki, klubun rəsmi saytında yayımlanan açıqlamada futbolçuların qeydiyyatının ləğv olunmayacağı vurğulanıb.
Bildirilib ki, Yüksək İdman Şurası (CSD) "Barselona"nın Olmo və Viktorla bağlı apelyasiyasını təmin edib. Eyni zamanda, Şura ilə İspaniya Futbol Federasiyası və La Liqa arasında təşkil olunmuş komitə futbolçuların qeydiyyatını təsdiqləyib. Klubun açıqlamasına görə, yanvarın 8-də qəbul edilən qərar oyunçuların peşəkar karyerasını davam etdirməsinə heç bir maneə yaratmır.
Qeyd edək ki, İspaniya mətbuatında Daniel Olmo və Pau Viktorun qeydiyyatının qaydalara uyğun olmadığı üçün ləğv ediləcəyi barədə məlumatlar yayılmışdı.