Ağdam. Trend:
Bəxtiyarın qəbri tapılanda keçirdiyimiz hissləri təsəvvür belə etmək olmaz.
Bunu Trend-ə şəhid Bəxtiyar Quliyevin bacısı Nailə Quliyeva deyib.
O bildirib ki, qardaşı çox mərd olub.
"Hətta onun 16 yaşında şəhid olmağı bunun bir göstəricisidir, mərdliyinin sübutdur. Atam çox tez, cavan yaşlarında rəhmətə gedib. Bəxtiyar evin böyük uşağı idi. Anam həmişə deyərdi ki, atan rəhmətə gedən kimi Bəxtiyar bütün yükü öz çiyinlərinə götürdü. 9-cu sinifdən maşın ustası yanına öyrənməyə getdi ki, maddi baxımdan anama dayaq olsun. O həmçinin mənəvi baxımdan anama kömək oldu. Keçən ilin 10-cu ayı mənə video atdılar. Dedilər ki, biz qəbri tapmışıq. Siz təsəvvür edə bilməzsiniz ki, biz o an hansı hissləri keçirdik. Həmin vaxt icazə götürüb gəldik. Gördüyünüz kimi, qəbir daşları dağıdılmış vəziyyətdə tapıldı. Ermənilərə yalnız vəhşi deyil, daha da artığını demək olar", - deyə o əlavə edib.
Qeyd edək ki, bu gün Qarabağ münaqişəsinin ilk iki şəhidindən biri – Bəxtiyar Quliyevin doğum günü münasibətilə anım tədbiri keçirilib. O, 1993-cü ildən sonra ilk dəfə doğma yurdunda anılıb. Ağdamın işğaldan azad edilmiş Şıxbabalı kəndində təşkil olunan mərasimdə şəhidin doğmaları ilə yanaşı, ictimaiyyət nümayəndələri, müharibə iştirakçıları və bir qrup kənd sakini iştirak edib. Tədbir iştirakçıları onun doğulduğu kənd qəbiristanlığındakı anım məzarını ziyarət edib, şəhidlərin ruhuna dualar oxuyublar.