Bakı. Trend:
Laçın, Salyan, Ağsu, Xaçmaz və Xızı rayon, həmçinin Şəki şəhər
mərkəzi xəstəxanalarının tibb heyəti tərəfindən “Uşaqların icbari
dispanserizasiyadan keçirilməsinə dair Dövlət Proqramı”na uyğun
olaraq uşaqların ilkin müayinələri həyata keçirilir.
Trend xəbər verir ki, bu barədə TƏBİB məlumat yayıb.
Bildirilib ki, Laçın Rayon Mərkəzi Xəstəxanasında Laçın şəhər 2 nömrəli tam orta məktəbinin şagirdləri üçün, Salyan şəhər 1 saylı tam orta məktəbdə, Ağsu Rayon Mərkəzi Xəstəxanasında Kalva kənd tam orta məktəbinin şagirdləri üçün, Xaçmaz şəhər 3 saylı körpələr evi-uşaq bağçasında, Xızı şəhər tam orta məktəbində, Şəki rayonunun Bideyiz, Baltalı və Layısqı kənd tibb məntəqələri və Mərkəzi Ailə Sağlamlıq Mərkəzində baş tutan müayinələr zamanı həkim-pediatr, həkim-nevroloq, həkim-oftalmoloq, həkim-otorinolarinqoloq, həkim-cərrah və s. ixtisaslı mütəxəssislər tərəfindən uşaqlar icbari dispanserizasiya çərçivəsində müayinə olunublar.
"Uşaqların icbari dispanserizasiyası çərçivəsində bu şəhər və rayonlarda yalnız bir gün ərzində 1400-ə yaxın uşaq ilkin müayinələrə cəlb olunub. Xəstəlik aşkarlanan uşaqlarla bağlı məlumatlar həm məktəb rəhbərliyinə, həm də valideynlərə təqdim edilib. Həmin şagirdlərin qısa zamanda ilkin səhiyyə xidməti göstərən tibb müəssisələrinə müraciət edərək geniştərkibli müayinələrdən keçməsi və aşkarlanan xəstəliklərin müalicəsinə başlanması tövsiyə olunub",- deyə əlavə edilib.
Qeyd edək ki, uşaqların icbari dispanserizasiyası Azərbaycan Respublikasının Prezidentinin 5 mart 2013-cü il Fərmanına uyğun olaraq davam etdirilir. İcbari dispanserizasiyasının əsas məqsədi uşaqlar, o cümlədən məktəblilər arasında xəstələnmə, sağlamlıq imkanlarının məhdudluğunun və ölüm səviyyəsinin azaldılmasıdır. İcbari dispanserizasiya zamanı uşaqlara illik profilaktik baxış həyata keçirilir. İcbari dispanserizasiya çərçivəsində uşaqlar hər il bir və ya bir neçə ixtisas üzrə mütəxəssislər (pediatr, stomatoloq, nevroloq, cərrah, endokrinoloq, uroloq, oftalmoloq, otorinolarinqoloq, dermatoloq və digər mütəxəssislər) tərəfindən diaqnostik və laborator müayinələrə cəlb edilir. Proses il ərzində mütəmadi şəkildə aparılır.