Bakı. Trend:
Səkkiz OPEC+ ölkəsi (Səudiyyə Ərəbistanı, Rusiya, İraq, BƏƏ, Küveyt, Qazaxıstan, Əlcəzair və Oman) neft bazarındakı sabitliyi qorumaq məqsədilə hasilatı artırmaq qərarına gəliblər.
Bu barədə Trend “OPEC”-ə istinadən məlumat verir.
Məlumata görə, 2024-cü ilin dekabrında qəbul edilən və 2025-ci ilin martında təsdiqlənən qərara əsasən, 1 apreldən başlayaraq mərhələli şəkildə gündəlik 2.2 milyon barel hasilat azaldılması geri qaytarılacaq.
Bu çərçivədə may ayında gündəlik 411 min barel əlavə hasilat planlaşdırılır. Bu artım üç aylıq mərhələyə uyğun olaraq həyata keçiriləcək və bazar vəziyyətinə görə dayandırıla və ya dəyişdirilə bilər.
Ölkələr həmçinin artıq hasil olunan neftin tam şəkildə kompensasiya ediləcəyini və 15 aprelə qədər yenilənmiş kompensasiya planlarını OPEC Katibliyinə təqdim edəcəklərini bildiriblər.
Səkkiz ölkə hər ay toplanaraq bazar vəziyyətini və hasilat razılaşmalarına əməl olunmasını müzakirə edəcək. Növbəti görüş 5 mayda keçiriləcək və iyun ayı üçün hasilat səviyyəsi müəyyən olunacaq.