Bakı. Trend:
Dünən işğaldan azad edilmiş Ağdam rayonunun Çəmənli kəndi ərazisində Ağdam rayon sakini minaya düşərək xəsarət alıb. İkinci Qarabağ müharibəsindən sonra 387 Azərbaycan vətəndaşı minaların qurbanı olub. Ermənistanın ölkəmizə qarşı mina terroru davam edir.
Mövzu ilə bağlı Sosial Tədqiqatlar Mərkəzinin əməkdaşı, siyasi təhlilçi Aqşin Kərimov Trend-ə açıqlamasında bildirib ki, mina problemi Ermənistanın region üçün buraxdığı təhlükəli mirasdır və insan həyatı, infrasrukturun qurulmasında ciddi risklər yaradır.
"Basdırılmış minalara qarşı mübarizə kollektiv səy tələb edir və bu xüsusda beynəlxalq ictimaiyyətin Ermənistana qarşı təzyiqləri artmalı, hətta ona sanksiya tətbiq edilməlidir.Çünki Azərbaycanın minatəmizləmə siyasətinə həlledici dəstək forması Ermənistana qarşı beynəlxalq cəza mexanizmlərinin işə salınmasıdır. Ancaq bu müşahidə olunmur, hərçənd ki, Azərbaycanın minatəmizləmə prosesinə beynəlxalq dəstək mexanizmləri də formalaşır. Azərbaycana mina təmizlənməsi üçün qabaqcıl texnologiyaların verilməsi həmin mexanizmin tərkib hissəsidir", - o qeyd edib.
A.Kərimov vurğulayıb ki, Azərbaycan-Ermənistan münasibətlərinin sülh üzrə dayanıqlı başa çatması üçün həll olunmalı problemlərdən biri də mina məsələsidir:
"Ermənistan mina basıdırılmış ərazilərin dəqiq xəritələrini Azərbaycan verməli və müharibədə törətdiyi mina ciayətlərinin məsuliyyətini etiraf etməlidir.
Bu, sülh gündəmində Ermənistanın edə biləcəyi orijinal yanaşmalardan biri ola bilər. Eyni zamanda, İrəvan təhlükəsizlik arxitekturasını pozmaq üçün həyata keçirdiyi mina terroruna görə kompensasiyaya razı olmalıdır".
"Minalar Əleyhinə Azərbaycan Kampaniyası" İctimai Birliyinin sədri Hafiz Səfixanov isə Trend-ə açıqlamasında bildirib ki, Ermənistanın Azərbaycana qarşı mina terroru, xüsusən də müharibə sonrası dövrdə, hələ də ciddi bir problem olaraq qalır.
"Azərbaycan hökuməti üçü minaların təmizlənməsi prioritet məsələdir. Ərazilərimizi minadan təmizləmək üçün beynəlxalq dəstək azdır. Belə ki, Azərbaycanda bu fəaliyyətə sərf edilən vəsaitin 96%-i dövlət büdcəmiz hesabına formalaşır".
H.Səfixanov qeyd edib ki, vətəndaşlarımız üçün minalarla bağlı maarifləndirmə tədbirləri də keçirilir.
"Minaların yerləşdiyi ərazilərdə hər hansı bir yanlış addım ciddi fəsadlara səbəb ola bilər. Bu səbəbdən, insanların bu barədə düzgün məlumatlandırılması, onlara təhlükəsizlik qaydaları barədə təlimat verilməsi həyati əhəmiyyət kəsb edir.
Minalanmış əraziləri tanımaq və oradan uzaq durmaq əsas qaydalardan biridir. Maarifləndirmə və təlimatlar həm də psixoloji müdafiə yaratmaq üçün əhəmiyyətlidir. İnsanlar təhlikə altında olduqda, düzgün məlumat və təlimatla daha etibarlı davranış sərgiləyə bilərlər. Bu, həm insanların həyatını qorumağa, həm də cəmiyyətin ümumi təhlükəsizliyini təmin etməyə kömək edir",- deyə o vurğulayıb.
Qeyd edək ki, Ermənistan tərəfindən qəsdən basdırılmış minalar Azərbaycanın mülki əhalisinin təhlükəsizliyini və rifahını təhlükə altına almaqda davam edir. Dünən Ağdamda daha bir mülki şəxs mina partlayışının qurbanı olub. 2020-ci il müharibəsinin bitməsindən indiyədək minalarla çirklənmə nəticəsində ümumilikdə 387 azərbaycanlı həlak olub və ya ağır yaralanıb.