Bakı. Trend:
2025 Formula 1 Dünya Çempionatının üçüncü mərhələsi – Yaponiya Qran Prisi cümə günü Suzuka trekində iki sərbəst məşqlə başlayacaq.
Trend xəbər verir ki, mövsümə uğurlu start verən “McLaren” komandası açılış iki mərhələdə gücünü göstərib. Əgər Avstraliya Qran Prisində son dövrələrdə başlayan yağış pilotların strategiyasını pozmasaydı, britaniyalı Lando Norris və avstraliyalı Oskar Piastri ardıcıl iki dəfə dubl edə bilərdilər. Hər iki sürücü indiyədək bir qələbə qazanıb.
Lando Norris 44 xalla turnir cədvəlinə başçılıq edir və dördqat dünya çempionu Maks Ferstappeni 8 xal qabaqlayır. “Red Bull” isə Yaponiya yarışına yeni heyətlə çıxacaq. Avstriya komandasının rəhbərliyi ilk iki yarışda Liam Lousonun performansından narazı qalaraq onu “Racing Bulls” komandasına yönləndirib. Onun yerini isə yaponiyalı Yuki Tsunoda tutub.
Suzuka treki unikal konfiqurasiyası ilə seçilir – o, çempionatda yeganə səkkizfiqurlu trasdır və körpü üzərindən keçid ilə fərqlənir. 1961-ci ildə açılan bu trek 1987-ci ildən etibarən Formula 1 Qran Prisinə ev sahibliyi edir. Lakin COVID-19 pandemiyası səbəbindən 2020 və 2021-ci illərdə yarış burada baş tutmayıb.