Bakı. Trend:
Rumıniya Azərbaycan Dövlət Neft Şirkətinin (SOCAR) ölkənin bazarında iştirakını genişləndirməsində maraqlıdır.
Bunu Trend-ə açıqlamasında Rumıniyanın Energetika naziri Sebastyan-İoan Burcua Cənub Qaz Dəhlizinin Məşvərət Şurasının Bakıda keçirilən 11-ci nazirlər iclası və “yaşıl” enerji üzər Məşvərət Şurasının 3-cü nazirlər iclası çərçivəsində bildirib.
“SOCAR yerli bazarda çox aktivdir və biz bunu alqışlayırıq. Biz aramızda olan əməkdaşlığın yüksək səviyyədə olmasını əsas tutaraq, onları Rumıniyada öz iştiraklarını genişləndirmələrinə təşviq edirik”, -deyə o bildirib.
Bundan başqa, Azərbaycandan Avropaya “yaşıl” enerjinin tədarükünü nəzərdə tutuan Qara dəniz kabel layihəsinin əhəmiyyətindən danışan nazir bunun olduqca ambisiyalı layihə olduğunu diqqətə çatdırıb.
“Bu dünyanın ən uzun sualtı kabeli olacaq. Biz artıq texniki-iqtisadi əsaslandırmanı başa çatdırmaq mərhələsinə yaxınlaşırıq, ardınca isə maliyyələşməni təmin etmək lazım gələcək. Biz xərclərin böyük hissəsini ehtiva edəcək Aİ qrantlarına bel bağlayırıq. Bu bizim enerji baxımından daha təhlükəsiz olmağımıza, daha ucuz və “təmiz” enerji əldə etməyimizə kömək olacaq. Bu həqiqətən hər kəz qazanacağı bir situasiyadır”, -Sebastyan-İon Burcua bildirib.