Laçın. Trend:
Ailə Qadın və Uşaq Problemləri üzrə Dövlət Komitəsinin sədri Bahar Muradova qohum nikahları və erkən nikaha təşəbbüslə bağlı qadağanın qüvvəyə minməsinə münasibət bildirib.
Trend-in Laçına ezam olunmuş əməkdaşı xəbər verir ki, komitə sədri Bahar Muradova bununla bağlı Laçında keçirilən ECO Qadınlar Forumu zamanı jurnalistlərin sualını cavablandırıb.
O qeyd edib ki, qadağalar bu vaxta qədər baş verən bir çox xoşagəlməz hadisələrin sayının azalmasına gətirib çıxaracaq:
"Bizim də məqsədimiz budur. Prosesi tənzimləməyə cavabdeh
qurumların əlaqəli fəaliyyəti, o cümlədən medianın dəstəyi, ictimai
rəyi formalaşdıran insanların prosesdə ardıcıl iştirakı və töhfəsi
faydalı olacaq.
Artıq qohum evlilikləri və erkən nikahla bağlı qanunazidd hər hansı
əməl mütləq şəkildə məsuliyyət yaradır. Daha əvvəl maarifləndirmə
ilə məşğul olurduqsa, indi konkret qadağaları əsas gətiririk. Bu
əməli törədənlər, qanunun müəyyən etdiyi normanı nəzərə almayanlar
mütləq şəkildə cəzalanacaqlar".