Bakı. Trend:
Avropa İttifaqı çox sayda istehlakçının Azərbaycan qazına əlçatanlığını təmin etməkdən ötrü müvafiq infrastrukturun müasirləşdirilməsi üzərində iş aparır.
Trend xəbər verir ki, bunu Avropa Komisiyasının enerji məsələləri üzrə komissarı Dan Yorgensen, Bakıda keçirilən “yaşıl” enerji üzrə Məşvərət Şurasının 3-cü nazirlər iclasında bildirib.
“Bütün maraqlı tərəfləri yaxın illərdə Azərbaycandan olan qazın regional bazarlara tədarükünü artırmaq istəyi birləşdirir. Azərbaycan qazının daha çox istehlakçıya əlçatanlığını təmin etməkdən ötrü biz artıq müvafiq infrastrukturun müasirləşdirilməsi üzərində iş aparırıq, eyni zamanda bərabər şəkildə metan tullantılarını azaltmağa can atırıq. Azərbaycanın ötən il COP29-da əldə etdiyi uğurların ardınca biz bu andan istifadə edib enerji keçidini sürətləndirmək istəyirik”, - deyə Yorgensen vurğulayıb.
Onun sözlərinə əsasən, bu 2030-cu ilə qədər bütün dünya üzrə enerji-səmərəliliyinin iki dəfə artırılması və bərpaolunan enerji mənbələrindən istifadə həcmlərinin üç dəfə artırılması anlamına gəlir. Bu eyni zamanda enerji şəbəkələri və saxlama sistemlərinin (Grids and Storage Pledge) inkişafı üzrə təşəbbüslərin və Metan üzrə Qlobal Öhdəliklərin (Global Methane Pledge) yerinə yetirilməsi deməkdir.
“İndi isə icazə verin, fürsətdən istifadə edib, Azərbaycanı metan məsələsi ilə bağlı Azərbaycanın ötən il əldə etdiyi nailliyyətlərlə bağlı təbrik edim. Azərbaycanın regionda bu istiqamətdə liderliyi öz üzərinə götürməsi ümid verir”,- deyə Yorgensen bildirib.