Bakı. Trend:
Bu gün iki əsas mövzu - qaz təchizatı və "yaşıl enerji" layihələrinin inkişafı müzakirə edildi. Cənub Qaz Dəhlizinin gələcəkdə genişləndirilməsi müzakirə olundu. Azərbaycanın kifayət qədər qaz ehtiyatları vardır. Hazırda müxtəlif yataqlarda işlər aparılır.
Trend xəbər verir ki, bunu bu gün Bakıda Cənub Qaz Dəhlizi və Yaşıl Enerji Məşvərət şuraları çərçivəsində keçirilən mətbuat konfransında Azərbaycanın energetika naziri Pərviz Şahbazov deyib.
Onun sözlərinə görə, eyni zamanda bu prosesin daha da sürətləndirilməsi və yeni qaz təchizatının əldə edilməsi, rəqəmlərin artırılması üçün daha çox Avropa İttifaqı ilə əməkdaşlığa ehtiyac var: "Ona görə ki, burada söhbət uzunmüddətli kontraktlardan getməlidir. Biz təbii qaz istehsal edirik. Qaz resursları, rezervləri Azərbaycanda kifayət qədər böyükdür. Bizim özümüzə uzun illər üçün bəs edəcək".
O əlavə edib ki, biz təbii qaz istehsal edirik və boru xətti ilə onu təchiz edirik.
"Bizim imkanlarımız yoxdur ki, əgər hər hansı səbəblərə görə qaz təchizatı baş verməsə, bunu başqa bir yerə yönəldək. Buna görə də bu bir xüsusiyyətdir. Bizə uzunmüddətli kontraktlar və eyni zamanda da Avropa İttifaqından qarantiyalar və mümkün qədər investisiyalar, maliyyələşdirilmlər lazımdır ki, biz daha böyük templə öz qaz istehsalı prosesini və bizi Avropa ilə birləşdirən qaz təchizatı infrastrukturunu genişləndirə bilək.
Biz "yaşıl enerji" sahəsində Azərbaycan tərəfindən irəli sürülən bir sıra təşəbbüsləri də geniş şəkildə müzakirə etdik. Bildiyiniz kimi, müxtəlif layihələr hal-hazırda həyata keçirilir. Onların sırasında mən Xəzər dənizi, Qara dəniz, Şərqi Avropa, Rumıniya, Macarıstan layihəsini qeyd etmək istəyərdim. Bu, ən öndə gedən, irəliləyən layihədir.", - nazir vurğulayıb.
Pərviz Şahbazov bildirib ki, biz bu gün Azərbaycan,Gürcüstan,Türkiyə və Bolqarıstanla daha bir layihənin əsasını qoyduq: "İlk baxışdan kimsə fikirləşə bilər ki, bu layihələr bir-birinə rəqabət yarada bilər. Amma elə deyil. Azərbaycanın kifayət qədər "yaşıl enerji" resursları var ki, hər iki layihə üzrə bu təchizatı həyata keçirə bilsin".