Bakı. Trend:
Azərbaycan qaz tədarükünü artıra bilsə, Avropa onun alınmasına böyük maraq göstərəcək.
Trend xəbər verir ki, bunu Bakıda keçirilən Cənub Qaz Dəhlizi Məşvərət Şurasının 11-ci nazirlər iclası və Yaşıl Enerji Məşvərət Şurasının 3-cü nazirlər iclasının yekunlarına dair mətbuat konfransında Avropa İttifaqının enerji və mənzil məsələləri üzrə komissarı Dan Yorgensen deyib.
"Avropada “yaşıl” keçid davam edir, bərpa olunan enerji mənbələri fəal şəkildə inkişaf etdirilir. Bununla belə, qaz hələ bir müddət enerji balansımızın bir hissəsi olaraq qalacaq. Əminəm ki, Azərbaycan tədarükünü artıra bilsə, Avropa alıcılığa böyük maraq göstərəcək. Bugünkü səfərimin səbəblərindən biri bunu mümkün etmək üçün nə edə biləcəyimizi müzakirə etməkdir. Bu, əlbəttə ki, Avropa Komissiyası ilə Azərbaycan hökuməti arasında gələcək danışıqlar üçün məsələdir, həm də ayrı-ayrı üzv dövlətlər, şirkətlər, qaz nəqli şəbəkəsi operatorları və digər iştirakçılarla müzakirə mövzusudur", - o bildirib.