Bakı. Trend:
"Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı” çərçivəsində "Bakı Metropliteni" QSC tərəfindən inşa edilən “Dərnəgül” elektrik deposu çox vacib, strateji obyektdir. Depo tikildikdən sonra ətrafında minə yaxın ağac əkiləcək.
Trend xəbər verir ki, bunu Dövlət Ekoloji Ekspertiza Agentliyinin İdarə Heyətinin sədr müavini İman Quliyev “Dərnəgül” elektrik deposunun tikintisi zamanı ətraf mühitə təsirlərinin, o cümlədən layihə altına düşən yaşıllıqların qiymətləndirilməsi üzrə ictimai dinləmədə deyib.
O bildirib ki, bu layihə nəqliyyat infrastrukturunun inkişafı üçündür:
“Bununla bağlı sənədlər bizə təqdim olunub və ekspertizası keçirilib, tövsiyələr verilib. Layihənin icrası üçün plana düşən ağacların yalnız köçürülməsi olacaq. Yaşıllıq landşaftı layihədə öz əksini tapmalıdır. Əks hal mümkün deyil. Ciddi nəzarət aparılır. Çalışırıq ki, həm layihələr icra olunsun, həm də ekoloji tədbirlərə əməl edilsin”.
“Bakı Metropoliteni” QSC-nin Perspektiv inkişaf və əsaslı tikintiyə nəzarət departamentinin rəisi Aftandil Bayramov isə əlavə edib ki, deponun tikintisi aparılacaq ərazidən 460-dan çox ağac köçürüləcək və bunun əvəzində minə yaxın yeni ağac əkiləcək.
