Bakı. Trend:
Asiya İnkişaf Bankı (AİB) və Asiya İnfirastruktur, İnvestisiya Bankı (AYİB) Azərbaycan, Qazaxıstan və Özbəkistan arasında “Xəzər Yaşıl Enerji Dəhlizi” layihəsinə 2 milyon dollar vəsait ayırıb.
Trend xəbər verir ki, bunu bu gün Bakıda Cənub Qaz Dəhlizi və Yaşıl Enerji Məşvərət şuraları çərçivəsində keçirilən mətbuat konfransında Azərbaycanın energetika naziri Pərviz Şahbazov deyib.
"Azərbaycan, Qazaxıstan və Özbəkistan arasında yaşıl elektrik enerji xəttinin inkişaf etdirilməsinə dair layihə həyata keçiririk. Bildiyiniz kimi, COP29 zamanı üç ölkənin dövlət başçısı tərəfindən hökumətlərarası müqaviləyə imza atılmışdır. Bu gün bu layihənin maliyyələşdirilməsi üçün Asiya İnkişaf Bankı və Asiya İnfirastruktur, İnvestisiya Bankı 2 milyon dollar vəsait ayırıb. Bu qərar haqqında biz-üç ölkə, iki bank bir sənəd də imzaladıq", - o bildirib.
Qeyd edək ki, bu gün Bakıda Cənub Qaz Dəhlizi və Yaşıl Enerji Məşvərət şuralarının iclasları çərçivəsində “Azərbaycan Respublikasının Energetika Nazirliyi, Qazaxıstan Respublikasının Energetika Nazirliyi, Özbəkistan Respublikasının Energetika Nazirliyi ilə Asiya İnkişaf Bankı və Asiya İnfrastruktur İnvestisiya Bankı arasında Anlaşma Memorandumu”nun imzalanması mərasimi olub. Azərbaycan, Qazaxıstan, Özbəkistanın energetika nazirləri tərəfindən imzalanmış sənədə AİB və AİİB-nin təmsilçiləri də qoşulub.
Bu memorandum Azərbaycan, Qazaxıstan və Özbəkistan arasında “Xəzər Yaşıl Enerji Dəhlizi” layihəsinin texniki-iqtisadi əsaslandırmasının (TİƏ) birinci mərhələsini dəstəkləmək məqsədilə əməkdaşlığı nəzərdə tutur.