Bakı. Trend:
Son iki gün ərzində Türkiyənin Kocaeli vilayətində toyuq dönərindən zəhərlənmə halları qeydə alınıb.
Trend xəbər verir ki, hadisə vilayətin Körfəz rayonunda baş verib. Ümumilikdə 648 nəfər qida zəhərlənməsi şübhəsi ilə xəstəxanaya müraciət edib.
Kocaeli valiliyindən verilən məlumata görə, hadisə ilə əlaqədar dərhal araşdırmalara başlanılıb, dönər satışı həyata keçirən müəssisə bağlanıb və barəsində cinayət işi açılıb. Həmin müəssisədə satışa hazır məhsullardan nümunələr götürülərək laborator müayinəyə göndərilib.
İlkin araşdırmalar nəticəsində zəhərlənmə hallarının baş verdiyi obyektin sahibləri müəyyən edilərək saxlanılıb və növbətçi məhkəmənin qərarı ilə həbs olunublar.
Valilik qeyd edib ki, xəstəxanaya yerləşdirilən şəxslərdən 646-sı ilkin tibbi yardımdan sonra evə buraxılıb, iki nəfərin isə müalicəsi davam edir.