Bakı. Trend:
Rumıniyada prezident seçkiləri kampaniyası rəsmi olaraq start götürüb.
Trend xəbər verir ki, seçkilərin birinci turu mayın 4-nə, ikinci turu (zərurət yaranarsa) mayın 18-nə təyin edilib.
Seçki yarışında 11 namizəd iştirak edir. Onlardan 7-si siyasi partiyalar tərəfindən irəli sürülüb, 4-ü isə müstəqil namizədlərdir. Ölkənin ən yüksək vəzifəsi uğrunda iki qadın və doqquz kişi mübarizə aparacaq.
Reytinqlərə əsasən, əsas favoritlər sırasında liberalların keçmiş lideri və Senatın keçmiş spikeri Krin Antonesku ("Rumıniya, İrəli!" partiyasının namizədi), Corc Simion (Rumınların Birləşməsi Uğrunda Millətçi Alyans), Buxarest meri Nicuşor Dan (müstəqil), keçmiş baş nazir Viktor Ponta (müstəqil) və Elena Laskoni (mərkəz sağçı Rumıniyanın Qurtuluşu İttifaqı) var.
Bundan əvvəl Konstitusiya Məhkəməsi millətçi siyasətçilər Kelin Gorgesku və Diana Şoşoakenin namizədliyini konstitusiya və demokratik prinsiplərə hörmətsizlik səbəbindən ləğv etmişdi.
Bəzi digər namizədlərin qeydiyyata alınmamasının əsas səbəbi isə tələb olunan imza sayını toplaya bilməmələri olub.