Bakı. Trend:
Türkiyədə ağır cinayətlər törətməkdə şübhəli bilinən və axtarışa verilmiş 8 nəfər Gürcüstanda həbs olunaraq Türkiyəyə gətirilib.
Trend xəbər verir ki, bu haqda Türkiyənin daxili işlər naziri Əli Yerlikaya öz “X” hesabında məlumat paylaşıb.
Əməliyyat Türkiyənin Ədliyyə Nazirliyi, Daxili İşlər Nazirliyinin İnterpol-Europol İdarəsi, Kəşfiyyat İdarəsi, Qaçaqmalçılıq və Mütəşəkkil Cinayətkarlıqla Mübarizə İdarəsi (KOM), Narkotiklərlə Mübarizə İdarəsinin və başqa qurumların əməkdaşlığı ilə həyata keçirilib.
Şübhəlilər arasında beynəlxalq səviyyədə ("Qırmızı" bülletenlə) axtarılan insan alveri, adam öldürmə, silahlı təhdid, soyğunçuluq, həmçinin, narkotik vasitələrlə əlaqədar cinayətlər törətməkdə şübhəli bilinən beş nəfər də yer alır.
Şübhəlilər Gürcüstanda ələ keçirilərək Artvin Sarp Sərhəd buraxılış məntəqəsində Türkiyə hakimiyyətinə təhvil verilib.
Türkiyənin daxili işlər naziri ölkədən qaçan heç bir cinayətkarın cəzadan yayına bilməyəcəyini vurğulayıb və əməliyyatda iştirak edən bütün qurumlara təşəkkürünü bildirib.