Bakı. Trend:
Boliviyada bir-birinə rəqib olan qızıl mədənçilər arasında baş verən silahlı qarşıdurma nəticəsində azı altı nəfər həyatını itirib.
Trend xəbər verir ki, bu barədə “Associated Press” yerli polisə istinadla məlumat yayıb.
Hadisə cümə axşamı səhər saatlarında, paytaxt La-Pasdan təxminən 150 kilometr şimal-qərbdə yerləşən Sorata şəhəri yaxınlığındakı Yani mədən düşərgəsində baş verib. Məlumata görə, qızıl yatağına nəzarət uğrunda baş verən münaqişə zamanı tərəflərdən biri dinamitdən istifadə edib. Partlayış bir neçə evin dağılmasına və elektrik enerjisinin kəsilməsinə səbəb olub.
Hadisə yerinə prokurorlar cəlb olunub. Kooperativlərdən birinin hüquqşünası Coni Silva bildirib ki, ölənlərin meyitləri dağıntılar altından çıxarılıb, lakin bir neçə nəfərin hələ də itkin düşdüyü qeyd olunur.