Bakı. Trend:
Cənub Qaz Dəhlizi Məşvərət Şurası nazirlərin 11-ci iclası və Yaşıl Enerji Məşvərət Şurası nazirlərin 3-cü iclası çərçivəsində energetika naziri Pərviz Şahbazov Trans-Adriatik Boru Kəmərinin (TAP) icraçı direktoru Luka Skyepatti ilə görüşüb.
Nazirlikdən Trend-ə bildirilib ki, görüşdə etibarlı enerji təchizatında təbii qazın və infrastrukturların inkişafının əhəmiyyəti, TAP layihəsinin genişləndirilməsi prosesinin cari vəziyyəti nəzərdən keçirilib.
Cənub Qaz Dəhlizinin, o cümlədən TAP-ın enerji təhlükəsizliyinin təminatında strateji rolu yüksək qiymətləndirilib. Bildirilib ki, TAP qaza olan tələbatın İtaliyada 15 faizini, Yunanıstanda isə 18 faizini təmin edir. İndiyə qədər Avropaya ümumilikdə 45 milyard kubmetrdən çox qaz təchiz edilib.
Söhbət zamanı 2026-cı ildən etibarən kəmərin 1,2 milyard kubmetr genişləndirilməsindən sonra növbəti nəzərdə tutulan addımlar, həmçinin metan emissiyalarının azaldılması ilə bağlı da müzakirələr aparılıb.
Qeyd edək ki, TAP təbii qazın Yunanıstan-Türkiyə sərhədindən İtaliyanın cənubuna qədər nəqlini təmin edərək, maraqlı tərəflərə qazın Avropanın müxtəlif ölkələrinə tədarükü imkanı yaradır.
TAP Cənub Qaz Dəhlizi çərçivəsində Xəzər dənizindən Avropaya qədər uzanan 3500 kilometrlik qaz marşrutunun bir hissəsi olaraq, birbaşa və iqtisadi cəhətdən səmərəli nəqliyyat yolu təklif edir.