Bakı. Trend:
İsveçrənin “Vacheron Constantin” şirkəti tarixdə ən mürəkkəb mexaniki qol saatını təqdim edib.
Trend bu barədə xarici mediaya istinadən xəbər verir.
Bildirilib ki, saat istehsalında mürəkkəblik Qriqorian təqvimi və ya ayın fazalarının təsvir edilməsi kimi ənənəvi zaman anlayışından kənara çıxan istənilən funksiyadır. Yeni “Les Cabinotiers Solaria Ultra Grand Complication” saatında bu cür funksiyalar rekord 41 sayda təqdim edilib.
Saatın düzəldilməsi səkkiz il çəkib, onlar cəmi 1521 komponentdən ibarətdir. Onlar hamısı sapfirlər də daxil olmaqla 200-dən çox qiymətli daşla bəzədilmiş 45 mm-lik 18k ağ qızıl qutuda yerləşdirilib. “Vacheron Constantin” 13 patent ərizəsi verib, onlardan yeddisi miniatür çəkiclərin dörd gonqa vurduğu unikal vurma mexanizmi ilə bağlıdır.
Saat, eyni zamanda üç vaxt növünü göstərir: adi 24 saatlıq vaxt, yan vaxt (Yerin ulduzlara nisbətən fırlanması ilə ölçülür) və planetin elliptik orbiti nəzərə alınmaqla tənzimlənən günəş günü.
“Bu, miniatürləşdirmə və innovasiyanın əsl şah əsəridir”, - deyə Stil və irs üzrə direktor Kristian Selmoni söyləyir.
1755-ci ildə əsası qoyulmuş və hazırda “Richemont” qrupunun bir hissəsi olan “Vacheron Constantin” şirkəti artıq ən mürəkkəb cib saatı üzrə rekorda sahibdir - 63 komplikasiya ilə “Berkley Grand Complication”. Lakin cib saatları daha böyük ola bildiyi üçün qol saatı ekvivalentinin düzəldilməsi daha çətin bir iş oldu.
“Solaria Ultra Grand Complication” saatı satış üçün nəzərdə tutulmayıb. “Vacheron Constantin” bu saatlara ilk növbədə mühəndislik nailiyyəti kimi baxır.