Bakı. Trend:
ABŞ hökuməti Çində yaşayan və ya səfərdə olan hökumət işçilərinin, onların ailə üzvlərinin, həmçinin, xüsusi təhlükəsizlik buraxılışları olan podratçıların Çin vətəndaşı olan şəxslərlə sevgi münasibətlərində və ya cinsi əlaqədə olmasını qadağan edib.
Trend xəbər verir ki, bu barədə “Associated Press” öz mənbələrinə istinadən məlumat yayıb.
Adları açıqlanmayan dörd mənbə agentliyə bildirib ki, belə göstəriş artıq yanvar ayından qüvvədədir.
Bu siyasətin daha yumşaq variantı keçən yay qüvvəyə minmişdi: ABŞ səfirliyi və Çindəki beş konsulluqda çalışan mühafizəçilərin Çin vətəndaşları ilə "romantik və seksual münasibətlərdə " olmaları qadağan edilmişdi.
Lakin ABŞ-nin Çindəki keçmiş səfiri Nikolas Börns vəzifədən ayrılmazdan əvvəl, yanvar ayında, (Prezident Donald Tramp vəzifəyə başlamazdan bir neçə gün əvvəl) bu siyasəti genişləndirərək, Çindəki bütün hökumət işçilərinin belə münasibətlər qurmasını tam şəkildə qadağan etmişdi.