Bakı. Trend:
Azərbaycan Respublikasının Gənclər Fondunun dəstəyi, “CAVAN” Gənclər Hərəkatının təşkilatçılığı və “Dəniz Mall”-un tərəfdaşlığı ilə, 15 dekabr tarixində, qızlar və oğlanlar arasında keçirilən “Ritmə Qarşı” rəqs müsabiqəsi enerji dolu çıxışlarla və coşqulu alqışlarla yekunlaşıb.
Müsabiqə, istedadlı gənclərin potensialının gücləndirmək, incəsənətə və rəqsin müxtəlif üslublarına olan marağı artırmaq məqsədini uğurla həyata keçirib.
“All styles” formatında təşkil olunan bu müsabiqə, 16-29 yaş arası rəqqasları bir araya gətirib. Onlar, öz bacarıqlarını səhnədə nümayiş etdirərək, həm münsifləri, həm də tamaşaçıları heyrətləndiriblər. İştirakçılar, ardıcıl battle-larla rəqabəti zirvəyə daşıyıblar.
Münsiflər heyəti – Nero Dance Crew-nun yaradıcısı Nərgiz Useynova, breakdance dünyasının birincilərindən olan B-boy Stimo və Cas – ən yaxşı performansları qiymətləndiriblər. Günün yekununda nominasiyalar üzrə “Ritmə Qarşı 2024” layihəsinin qalibləri seçilib və hədiyyələrlə mükafatlandırılıb.
“Ritmə Qarşı” rəqs müsabiqəsi təkcə bir yarışma deyil, həm də dostluq, birlik və istedadların bayramı olub. Bu unudulmaz gün, həm iştirakçılar, həm də tamaşaçılar üçün rəqsin və musiqinin birləşdirici gücünü bir daha təsdiq edib.
Tədbir, möhtəşəm xatirələrlə yaddaşlara həkk olunub və gələcəkdə keçiriləcək oxşar layihələr üçün ilham mənbəyi olub.
