Bakı. Trend:
İran heç vaxt və heç bir şəraitdə atom bombası düzəltmək və yaxud nüvə silahlarını əldə etmək ardınca düşməyəcək.
Trend-in məlumatına görə, bunu İranın xarici işlər naziri Seyid Abbas Araqçi “X” sosial şəbəkəsindəki hesabında yazıb.
"Bəlkə də, ABŞ prezidenti 2015-ci ildə əldə olunan nüvə razılaşmasında maraqlı deyil. Lakin hələ də qüvvədə olan və ABŞ-nin tərk etdiyi o razılaşma İran tərəfindən verilən əsaslı öhdəliyə zəmanət verir", XİN rəhbəri qeyd edib.
Araqçi bildirib ki, Hərtərəfli Birgə Fəaliyyət Planının (JCPOA) imzalanmasından 10 ilin keçməsi və ABŞ-nin birtərəfli qaydada həmin sazişdən çıxmasından 7 ilin keçməsinə baxmayaraq, hətta ən kiçik bir sənəd yoxdur ki, İranın öhdəliyini pozduğunu əks etdirsin.
“Hamıya aydın olmalıdır ki, ötən illərdə diplomatik anlaşma yetərli olduğunu əks etdirib və hələ də yetərli ola bilər. Prinsipial olaraq “hərbi seçim” adlı məsələ mövcud deyil. Regionumuzda ABŞ-nin keçmiş hökumətlərinin 7 trilyon dollardan çox vəsait xərcləməsi ilə nəticələnən hadisələr yetərincə hər şeyi bəyan edir”, - deyə o bildirib.
Qeyd edək ki, Atom Enerjisi üzrə Beynəlxalq Agentliyin baş direktoru Rafael Qrossi 3 martda agentliyin Direktorlar Şurasının iclasında bildirib ki, İran 60%-ə qədər zənginləşdirilmiş uranın həcmini ötən rüblə müqayisədə 182 kiloqramdan 275 kiloqramadək artırıb. İran uranı bu səviyyəyə qədər zənginləşdirən yeganə qeyri-nüvə silahı dövlətidir. Bu isə ciddi narahatlıq doğurur.
Xatırladaq ki, 30 martda ABŞ prezidenti Donald Tramp bildirib ki, Tehran nüvə proqramı ilə bağlı sazişə razılıq verməsə, İran görünməmiş bombardmanlarla üzləşəcək.
Əlavə edək ki, 2020-ci ilin sonlarında İran parlamenti İrana qarşı sanksiyaların tətbiq olunmasını əsas gətirərək sanksiyaların ləğv edilməsi məqsədilə nüvə sahəsində strateji planın icra edilməsinə qərar verib. İran parlamentinin qərarına əsasən, İran 23 fevraldan nüvə sazişində nəzərdə tutulan əlavə addımlar və əlavə protokolun icrasını dayandırıb. Bununla AEBA-nın nəzarət mexanizmi 20-30% azalıb.
İran rəsmi səviyyədə bildirir ki, İranın strategiyası atom bombasını əldə etməməkdir və İran kütləvi qırğın silahlarının istehsalını əsla dəstəkləmir.