Bakı. Trend:
Aprel döyüşləri Azərbaycanın hərb tarixində qəhrəmanlıq səhifələrindən biri olmaqla yanaşı işğal altında olan torpaqlarımızı azad etmək istiqamətində atdığı mühüm addımlardan biri olub.
Bunu Trend-ə Milli Məclisin deputatı Afət Həsənova deyib.
Deputat bildirib ki, 2016-cı il aprelin 2-də Ermənistan silahlı qüvvələri təmas xəttində genişmiqyaslı təxribat törədərək Azərbaycan mövqelərinə və mülki əhaliyə hücum etdilər:
“Buna cavab olaraq, Azərbaycan Ordusu əks-hücum əməliyyatına başladı və qısa müddətdə mühüm əraziləri azad etdi. Aprel döyüşləri nəticəsində Azərbaycan Ordusu 2,000 hektardan çox ərazini işğaldan azad etdi. Ən mühüm nailiyyətlərdən biri Lələtəpə yüksəkliyinin və Talış kəndi ətrafındakı strateji mövqelərin azad edilməsi oldu. Bu ərazilərin azad olunması həm hərbi, həm də geostrateji baxımdan mühüm əhəmiyyət daşıyırdı”.
Deputat qeyd edib ki, aprel döyüşlərində Azərbaycan düşmən üzərində hərbi qələbə ilə yanaşı böyük mənəvi-psixoloji qələbə də qazandı.
“Aprel qələbəsi ilə cinayətkar erməni rəhbərlərinin keçilməz erməni səngərləri haqqında mifi alt-üst edildi. Ermənistan hakimiyyəti xalqı öz ordularının məğlubedilməz olduğuna “inandırmışdı”. Lakin aprel döyüşləri bu yalanı ifşa etdi, erməni ordusunun əslində qorxaq və zəif olduğunu üzə çıxardı.
Bununla yanaşı, bu döyüşlər 44 günlük Vətən müharibəsinin uğurlu başlanğıcı oldu. Ermənistan tərəfi aprel döyüşlərindən heç bir nəticə çəxarmadı və təxribatları davam etdirdi. Bunun nəticəsində Azərbaycan əks-hücum əməliyyatlarına başlamalı oldu və tarixi zəfər qazanmaqla torpaqlarımız işğaldan azad edildi. Aprel döyüşləri Azərbaycan tarixinə qızıl hərflərlə yazılmış bir qəhrəmanlıq səhifəsidir. Bu qələbə Azərbaycan Ordusunun gücünü və xalqın birliyini nümayiş etdirdi”.
A.Həsənova əlavə edib ki, Azərbaycan Ordusu Aprel döyüşləri zamanı şəhidlər verdi. “Onların qəhrəmanlığı nəticəsində Azərbaycan xalqı böyük bir tarixi zəfərə şahid oldu. Xüsusilə şəhid zabit və əsgərlərimizin göstərdiyi şücaət gələcək nəsillərə nümunə oldu. Bu gün torpaqlarımız azadlığına qovuşub və şəhidlərimizin ruhu şaddır”.