Bakı.Trend:
İkitərəfli iqtisadi-ticari qarşıdurma çərçivəsində Çin hökuməti ABŞ-yə “cavab zərbəsi endirib”.
Trend xəbər verir ki, bu barədə xarici KİV-lər öz mənbələrinə istinadən yazır.
Məlumata görə, Ağ Ev rəhbəri Donald Trampın administrasiyası tərəfindən Çin məhsullarına qarşı tətbiq olunan 20 faizlik gömrük rüsumuna cavab olaraq rəsmi Pekin Çindən olan şirkətlərin Amerika iqtisadiyyatına investisiyalarını məhdudlaşdırıb.
Qeyd edək ki, cari ilin mart ayında Çin hakimiyyəti İnkişaf və İslahatlar üzrə Milli Komissiyanın bölmələrinə müvafiq göstəriş vermişdi. Komissiya əməkdaşlarına ABŞ iqtisadiyyatına sərmayə qoymaq istəyən yeni şirkətlərin qeydiyyatının dayandırılması tapşırılmışdı.
Statistikaya əsasən, 2023-cü ildə Çin Xalq Respublikasının ABŞ-ın ÜDM-nə ümumi investisiya həcmi 6,9 milyard dollar təşkil edib.
Mənbələr məhdudiyyətlərin nə vaxt ləğv olunacağı barədə dəqiq cavab verə bilməyiblər. Bununla belə, bu ölçlərin Tramp administrasiyasının Çinə qarşı aqressiv ticarət-iqtisadi siyasətinin yumşaldılmasından sonra aradan qaldırılacağı istisna edilmir.