Bakı. Trend:
2025-ci ilin mart ayında ölkə üzrə havanın temperaturu bəzi günlərdə normadan yuxarı, bəzi günlərdə isə normadan aşağı olub. Bakı və Abşeron yarımadasında havanın temperaturu iqlim norması ilə müqayisədə 27 gün normadan yuxarı (+0.3 dərəcədən +16.0 dərəcəyədək), 4 gün isə normadan aşağı (+0.7 dərəcədən +6.3 dərəcəyədək) olub, orta aylıq temperatur isə +9.7 dərəcə qeydə alınıb.
Bunu Trend-ə Milli Hidrometeorologiya Xidmətinin rəisi Nazim Mahmudov bildirib.
Onun sözlərinə görə, ötən ay maksimal temperatur martın 18-də qeydə alınıb ki, həmin gün havanın maksimal temperaturu Kürdəmir rayonunda +32.5 dərəcə, Bakıda və Abşeron yarımadasında isə +32.1 dərəcə olub. Minimal temperatur isə ölkə üzrə martın 2-i Şahdağda -21.2 dərəcə, Bakıda və Abşeron yarımadasında isə -6 dərəcə olub.
“2025-ci ilin mart ayında bölgələr üzrə 12 gün yağıntılı hava şəraiti müşahidə olunub. Ən çox yağıntı aylıq normanın 127 faizi olmaqla Lənkəran-Astara zonasına, aylıq normanın 86 faizi olmaqla isə Bakı və Abşeron yarımadasına düşüb.”
N. Mahmudov qeyd edib ki, mart ayının bəzi günlərində dağlıq və dağətəyi ərazilərə qar yağıb. Yağan qar nəticəsində qar örtüyünün maksimal hündürlüyü Zaqatalanın dağlıq ərazilərində (Əlibəy) 105 sm olub. Martın 23-də Ağsu rayonuna diametri 6 mm olan dolu düşüb.
“Mart ayının bəzi günlərində küləkli hava şəraiti ilə bağlı rəng şkalasına uyğun olaraq 8 dəfə sarı və narıncı xəbərdarlıq verilib. Bakıda və Abşeron yarımadasında 15 gün, bölgələrdə isə 16 gün küləkli olub. Küləyin maksimal sürəti Bakıda və Abşeron yarımadasında 27 m/s, bölgələrdə isə 30 m/s-dək güclənib.”