Bakı. Trend:
Aprel döyüşləri Azərbaycan dövləti, xalqı və ordusunun Ermənistan üzərində hərbi, siyasi, psixoloji, mənəvi qələbəsidir. Aprelin 1-dən 2-nə keçən gecə Ermənistan ordusunun növbəti təxribatına cavab verən Azərbaycan Silahlı Qüvvələrinin məhdud sayda şəxsi heyəti ermənilərin keçilməz hesab etdiyi istehkamı qısa müddət ərzində darmadağın etməklə Ermənistan cəmiyyətində uzun müddət idi ki, hakim olan məğlubedilməzlik mifini alt-üst etdi. Bəlli oldu ki, Ermənistan cəmiyyətini miflərdən başqa birləşdirən heç bir dəyər yoxdur.
Bu fikirləri Trend-ə açıqlamasında Milli Məclisin deputatı Elçin Mirzəbəyli deyib.
O bildirib ki, Aprel döyüşləri Azərbaycanın hərtərəfli üstünlüyünü nümayiş etdirməklə yanaşı, ölkənin gələcək zəfər yolunun əsasını qoydu:
“Bu dördgünlük müharibə Azərbaycanın status-kvonun dəyişdirilməsi üçün ciddi iradə nümayiş etdirəcəyini və öz ədalətli mövqeyindən geri çəkilməyəcəyini bir daha təsdiqlədi. Aprel döyüşləri Azərbaycanın hərbi qüdrətinin və döyüş hazırlığının yüksək səviyyədə olduğunu sübut etdi. Azərbaycan Ordusu mühüm strateji əraziləri, xüsusilə Lələtəpə və Talış yüksəkliklərini azad etdi. Bu, gələcək hərbi əməliyyatlar üçün əlverişli mövqelərin ələ keçirilməsi baxımından da mühüm əhəmiyyət daşıyırdı. Azərbaycan bu döyüşlərdə müasir silah və texnologiyalarından istifadə edərək, düşmənin müdafiə xətlərini qısa müddətdə yarmağı bacardı.
Millət vəklinin sözlərinə görə, bu döyüşlər Azərbaycan hərbçilərinin yüksək peşəkarlığını və motivasiyasını nümayiş etdirdi ki, bu da 2020-ci ildəki Vətən müharibəsində həlledici amillərdən biri oldu:
“Döyüşlərdən sonra Ermənistan cəmiyyətində ciddi narazılıq yarandı, hökumətə olan inam azaldı və daxili siyasi böhran daha da gücləndi. Ermənistan əhalisi və ordusu Azərbaycanın gücünü və müasir döyüş taktikasını görərək psixoloji cəhətdən sarsıldı. Aprel döyüşləri Azərbaycan xalqında qələbəyə olan inamı artırdı və milli birlik hissini gücləndirdi. Azərbaycan cəmiyyəti bu döyüşlərdən sonra ordusunun gücünü və potensialını daha aydın şəkildə gördü”.
E.Mirzəbəyli vurğulayıb ki, Aprel döyüşləri Azərbaycanın gələcəkdə tam qələbəyə nail ola biləcəyini sübut etdi və 2020-ci ildə 44 günlük Vətən müharibəsinin qazanılması üçün mühüm psixoloji təməl yaratdı.
“Aprel döyüşləri bütövlükdə Azərbaycanın hərbi, siyasi, psixoloji və iqtisadi gücünü nümayiş etdirən tarixi hadisə oldu. Bu döyüşlər təkcə dörd gün davam etmədi, onların təsiri illərlə davam edərək Azərbaycanın 2020-ci ildə qazandığı böyük zəfərin başlanğıcı oldu. Bu qələbə xalqın və ordunun birliyini gücləndirdi, Azərbaycanın haqq savaşında haqlı olduğunu bütün dünyaya sübut etdi və işğal altındakı torpaqların tam azad edilməsi üçün strateji zəmin yaratdı”, - deyə deputat fikrini tamamlayıb.
Milli Məclisin deputatı Vüqar İskəndərov isə Trend-ə açıqlamasında xatırladıb ki, 2016-cı il aprelin əvvəllərində Ermənistan Silahlı Qüvvələri tərəfindən Azərbaycanın ön xətdəki mövqeləri və bir neçə yaşayış məntəqələri intensiv artilleriya atəşinə tutulmağa başladı:
“Şanlı Azərbaycan ordusu bu hücuma qarşı əks-həmlə əməliyyatı həyata keçirdi və təxribatların qarşısını mərdliklə aldı. Bu döyüşlər Azərbaycan ordusunun tarixi qələbəsi ilə nəticələnmiş oldu. Tərtərin Talış kəndi ətrafındakı yüksəkliklər, Cəbrayılın Lələtəpə yüksəkliyi, Cocuqmərcanlı kəndləri, Goranboyun Gülüstan kəndi və Tərtərin Madagiz kəndi istiqamətində vacib mövqelər düşməndən azad edildi. Ordumuz həmin ərazi və yüksəkliklərdə çox vacib mövqelərdə möhkəmlənmiş oldu.
Aprel döyüşləri 2016-cı ilədək Ermənistan tərəfindən yaradılmış yalançı miflər – “yenilməz ordu”, cürbəcür manipulyativ bəyanatlar, orduda ruh yüksəkliyinin olması və s. fikirlər tamamilə alt-üst oldu. Bundan təşvişə düşən Ermənistan qısa vaxt ərzində bütün beynəlxalq təşkilatlara Azərbaycan Prezidenti ilə görüşlərin keçirilməsi üçün müraciətlər etdi. Üçtərəfli görüşlərdə Ermənistan tərəfinin yalvarışları səsləndi, iki ölkə arasında etimad tədbirlərinin möhkəmlənməsi üçün insidentlərin araşdırılması tövsiyə olundu. Ermənistan bununla da bir daha öz acizliyini, Azərbaycan isə qələbə əzmini və torpaqların heç vaxt vaz keçməyəcəyini ortaya qoymuş oldu”.
Millət vəkili vurğulayıb ki, 2020-ci il Vətən müharibəsindəki, 2023-cü ildə antiterror tədbirlərindəki qələbənin müjdəçisi məhz Aprel döyüşləri oldu.
“Bu döyüşlər bizdə özünəinamı yüksəltdi, bizi torpaqlarımızı işğaldan azad edəcəyimiz günə yaxınlaşdırdı. Azərbaycan ordusu həmin hadisələrdən 4 il sonra əks-hücum əmri ilə şanlı, qürurlu zəfər əldə etdi. Biz bu münaqişə və müharibəni həll etməklə dünyaya sürətlə inkişaf edən, nüfuzlu və hörmətə layiq yeni bir Azərbaycan siması tanıtdıq. Aprel döyüşləri ilə Azərbaycan bütün dünyaya sübut etdi ki, bu xalq torpaqlarının itirilməsinə heç vaxt razı olmayıb”, - V.İskəndərov qeyd edib.