Dublin.Trend:
Avropa ilə Cənubi Qafqaz arasında nəqliyyat və enerji əlaqələrinin inkişafı etibarlı enerji təchizatı sisteminin formalaşdırılması baxımından mühüm əhəmiyyət kəsb edir.
Bunu Litva Prezidenti Qitanas Nauseda Dublində keçirilən Avropa Siyasi Birliyinin (ASB) sammiti çərçivəsində Trend-in sualını cavablandırarkən bildirib.
Cənubi Qafqazla Avropa arasında əlaqələrin gücləndirilməsində Orta Dəhlizin əhəmiyyətini şərh edən prezident əlaqələrin inkişafı prosesinin davam etdiyini və Litvanın müvafiq layihələri dəstəklədiyini qeyd edib.
“Biz əlaqələrin inkişafına yönəlmiş bütün layihələri dəstəkləyirik. Əlbəttə, hazırda biz daha çox Avropa daxilində, xüsusilə Baltikyanı ölkələr arasındakı əlaqələrdən danışırıq. Lakin etibarlı enerji təchizatı sisteminin yaradılması üçün Avropadan bir qədər uzaqda yerləşən tərəfdaşlarımızın da iştirakı çox vacibdir”, – deyə Nauseda bildirib.
Onun sözlərinə görə, enerji dəhlizlərinin inkişafı Azərbaycan və Avropa ölkələrinin qarşılıqlı maraqlarına uyğundur.
“Düşünürəm ki, bu, ikitərəfli prosesdir. Həm Azərbaycanın, həm də Avropanın səmərəli və dayanıqlı fəaliyyət göstərən enerji dəhlizlərinin yaradılmasında marağı var”, – deyə Litva Prezidenti vurğulayıb.
Qeyd edək ki, İrlandiyanın paytaxtı Dublində Avropanın 50-yə yaxın ölkəsinin və digər tərəfdaş dövlətlərin liderlərini bir araya gətirən Avropa Siyasi Birliyinin (EPC) 9-cu sammiti keçirilir.
Görüş Avropa Şurasının Prezidenti Antonio Koşta və İrlandiyanın Baş naziri Mixol Martinın həmsədrliyi ilə Dublin Konfrans Mərkəzində keçirilir. Sammit “Güclü, təhlükəsiz və qarşılıqlı əlaqəli Avropa” şüarı altında təşkil olunub.
Gündəliyin əsas mövzuları sırasında Avropanın təhlükəsizliyi, Rusiyanın Ukraynaya qarşı müharibəsi, iqtisadi rəqabət qabiliyyəti, enerji təhlükəsizliyi, nəqliyyat infrastrukturunun inkişafı və regional qarşılıqlı əlaqələrin gücləndirilməsi yer alır.
Avropanın müdafiə imkanlarına, kiberhücumlara, dezinformasiyaya və digər hibrid təhdidlərə qarşı mübarizəyə, həmçinin Avropanın təhlükəsizliyinin təmin edilməsində Avropa ölkələri və ABŞ arasında məsuliyyət bölgüsünə xüsusi diqqət yetiriləcək.
İqtisadi gündəliyə innovasiyaların və rəqəmsal infrastrukturun inkişafı, nəqliyyat əlaqələrinin gücləndirilməsi, enerji resurslarının əlçatan və etibarlı təchizatının təmin edilməsi, eləcə də Avropa iqtisadiyyatının xarici təsirlərə qarşı dayanıqlığının artırılması daxildir.
Avropa Siyasi Birliyi 2022-ci ildə Rusiya-Ukrayna müharibəsinin başlamasından sonra Avropa ölkələri arasında siyasi dialoq və koordinasiya platforması kimi yaradılıb.
Azərbaycan üçün sammitdə iştirak enerji əməkdaşlığı, Cənubi Qafqazda sülh prosesi və nəqliyyat əlaqələrinin inkişafı baxımından xüsusi əhəmiyyət daşıyır.
EPC-nin növbəti sammitinin 2028-ci ilin may ayında Azərbaycanda keçirilməsi planlaşdırılır. Bu, Bakıya Avropa liderlərini qəbul etmək, regional məsələlər və daha geniş Avropa gündəliyi üzrə dialoqu davam etdirmək imkanı verəcək.
Dublində Avropa Siyasi Birliyinin sammiti başa çatdıqdan sonra, noyabrın 13-də Avropa İttifaqına üzv 27 dövlətin liderlərinin ayrıca qeyri-rəsmi görüşü keçiriləcək.
