Bakı. Trend:
Xalq rəssamı Arif Hüseynovun əsərləri Parisdə nümayiş etdiriləcək.
Trend xəbər verir ki, aprel ayının 4-də Fransada Azərbaycanın görkəmli incəsənət xadimi, xalq rəssamı Arif Hüseynovun əsərləri sənətsevərlərə təqdim ediləcək.
Dünyaşöhrətli rəssamların Parisdə təşkil ediləcək sərgisində istedadlı həmyerlimizin də iki maraqlı əl işi –“Sevgililər” və “Xoşbəxtlik quşu“ əsərləri sərgilənəcək.
Sərgi Türkiyənin “Saküder – Sanat ve Sanatkarlar Topluluğu Kultur Derneği (Sakuder ART Gallery)” tərəfindən təşkil ediləcək. Sərgi Fransanın Luvr muzeyində fəaliyyət göstərən, dünyanın mötəbər sərgi salonlarından olan “PARİS ART SHOPPING CARROUSEL DU LOUVRE SALON INTERNATIONAL D’ART CONTEMPORAIN”da baş tutacaq. Aprel ayının 7-nə qədər davam edəcək sərgidə eləcə də tanınmış türk rəssamı Asım Yücesoyun, istedadlı fırça ustaları Günəş Abbas, Ayşe Gürpınar, Bahar Quliyeva, Başak Eren, Cəmilə Əkbərova, Hüseyin Işık, Nazım Məmmədov, Nihal Yalçın və digərlərinin də əsərləri nümayiş etdiriləcək.
Onu da qeyd edək ki,”Sakuder ART Qallery” artıq ikinci ildir ki,Arif Hüseynovun əsərlərini Fransada sərgiləyir. Ötən il rəssamın ”Leyli” və “Məcnun” əsəri sənətsevərlərə təqdim edilmişdi. Bu ilin payızında ”Sakuder ART Qallery”nin təşkilatçılığı ilə İtaliyada rəssamın növbəti sərgisi planlaşdırılır.
