Bakı. Trend:
Uşaq hüquqlarının həyata keçirilməsinin uşaqların təhlükəsizliyinin təmini sahəsində təmin edilməsi vəziyyətinin monitorinqi üzrə meyarlar müəyyənləşib.
Trend xəbər verir ki, bu məsələ Nazirlər Kabineti müvafiq qərarı ilə təsdiq edilən “Uşaq hüquqlarını həyata keçirilməsinin bütün sahələrdə təmin edilməsi vəziyyətinin monitorinqi üzrə meyarlar”da öz əksini tapıb.
Qərara əsasən, uşaq hüquqlarının həyata keçirilməsinin uşaqların təhlükəsizliyinin təmini sahəsində təmin edilməsi vəziyyətinin monitorinqi üzrə meyarlar aşağıdakılardır:
- uşaqların təhlükəsizliyinin təmin edilməsi ilə bağlı qanunvericiliyin BMT-nin Uşaq hüquqları haqqında Konvensiyasına uyğunlaşdırılması üzrə görülən tədbirlər;
- yetkinlik yaşına çatmayanların baxımsızlığının və hüquq pozuntularının profilaktikası istiqamətində həyata keçirilən tədbirlər;
- uşaq qaynar xətt xidmətləri;
- il ərzində uşaq hüquqlarının pozulması ilə bağlı dövlət orqanlarına (qurumlara) edilən müraciətlərin sayı;
- yetkinlik yaşına çatmayanları cinayətkar fəaliyyətə, fahişəliyə, pornoqrafiya tamaşalarında iştirak etməyə və ya digər əxlaqsız əməllərə cəlb edən şəxslərin aşkar edilməsinə dair məlumat;
- yetkinlik yaşına çatmayanların tərbiyəsi, təhsili və saxlanılması üzrə öz vəzifələrini yerinə yetirməyən və ya lazımınca yerinə yetirməyən valideynlərin və digər qanuni nümayəndələrin, vəzifəli şəxslərin aşkar edilməsinə dair məlumat;
- yetkinlik yaşına çatmayanların zorakılıq və istismar hallarından müdafiəsi üçün həyata keçirilən tədbirlər;
- məişət zorakılığına məruz qalmış uşaqların hüquqlarının müdafiəsi üzrə tədbirlər;
- hüquq pozuntusu törətmiş yetkinlik yaşına çatmayanlar barəsində, habelə onların tərbiyəsi, təhsili və saxlanılması üzrə öz vəzifələrini yerinə yetirməyən və ya lazımınca yerinə yetirməyən, onların tərbiyəsinə mənfi təsir göstərən, yaxud onlarla qəddar rəftar edən valideynlər və ya digər qanuni nümayəndələr, yaxud vəzifəli şəxslər barəsində Azərbaycan Respublikasının qanunlarında nəzərdə tutulmuş təsir tədbirlərinin tətbiq edilməsi haqqında müvafiq dövlət orqanlarına verilmiş təkliflərin sayı və qısa məzmunu;
- uşaqlara qarşı və onlar tərəfindən törədilən hüquqpozmaların təhlili;
- baxımsız və sosial təhlükəli vəziyyətdə olan uşaqlar üçün sosial reabilitasiya müəssisələrinin fəaliyyəti, bu müəssisələrdən yararlanan uşaqların sayı;
- uşaq əməyinin istismarının qarşısının alınması sahəsində həyata keçirilən hüquqi, sosial və qabaqlayıcı tədbirlər;
- cinsi istismarın və cinsi zorakılığın qurbanı olan uşaqların hüquqlarının müdafiəsi istiqamətində tədbirlərin təşkili;
- cinsi istismar və ya cinsi zorakılığa məruz qalmış uşaqlarla işləyən mütəxəssislərin hazırlanması;
- doğumun qeydiyyatı, doğumu qeydiyyata alınan 5 yaşadək uşaqların sayı və uşaqların ümumi sayında faizlə nisbəti;
- uşaq alverinin qarşısının alınması sahəsində həyata keçirilən tədbirlər;
- küçə həyatı yaşayan uşaqların sayı və onların hüquqlarının müdafiəsi üzrə həyata keçirilən tədbirlər;
- baxımsız vəziyyətdə olan və küçə həyatı yaşayan uşaqlara dair müşahidələrin aparılması və nəticələrin təhlili;
- uşaqların zərərli informasiyadan qorunması sahəsində həyata keçirilən tədbirlər;
- silahlı münaqişələrin təsirinə məruz qalmış uşaqların müdafiəsi və reabilitasiyası üzrə görülən tədbirlər;
- erkən evlilik hallarının qarşısının alınması üzrə görülən tədbirlər;
- erkən evlilik hallarının regionlar üzrə tədqiqi;
- uşaq intiharları ilə bağlı məlumatlar (cins, yaş, ailə vəziyyəti, ərazi və intiharın səbəbləri üzrə);
- uşaq intiharlarının qarşısının alınması istiqamətində tədbirlərin həyata keçirilməsi;
- uşaqların iştirakı ilə baş verən qəzaların qarşısının alınması, yol hərəkəti təhlükəsizliyinin artırılması məqsədilə maarifləndirmə tədbirlərinin keçirilməsi;
- uşaqların iştirakı ilə baş verən qəzalara, o cümlədən yol-nəqliyyat hadisələrinə dair məlumatların (cins, yaş və ərazi üzrə) təhlili;
- sağlamlığı və ya həyatı birbaşa təhlükədə olan və valideynlərdən (onların birindən) və ya onu qəyyumluğa (himayəyə) götürmüş şəxslərdən təcili olaraq alınan uşaqların sayı və cins tərkibi.