Bakı. Trend:
ABŞ prezidenti Donald Trampın Birləşmiş Ştatlara daxil olan bütün məhsullardan 10 faizlik gömrük rüsumunun tutulması ilə bağlı qərarı beynəlxalq ictimaiyyət tərəfindən birmənalı qarşılanmayıb. Bir sıra hökumət başçıları belə bir siyasətin qarşılıqlı münasibətlərə ziyan vuracağını bildirib.
Trend xəbər verir ki, Avstraliyanın baş naziri Entoni Albaneze yeni rüsum siyasətinin ABŞ-Avstraliya dostluq münasibətlərinə zidd olduğunu bildirib.
"Administrasiyanın (ABŞ prezidenti Donald Trampın) tarifləri heç bir məntiqi əsas daşımır, ölkələrimiz arasındakı tərəfdaşlıq prinsiplərinə ziddir. Bu, dostluqdan uzaq bir addımdır. Bu gün qəbul edilən qərar dünya iqtisadiyyatında qeyri-müəyyənliyi daha da gücləndirəcək və Amerika vətəndaşlarının xərclərini artıracaq", - hökumət başçısı jurnalistlər qarşısında çıxış edərkən bildirib.
O, bir daha vurğulayıb ki, Kanberra ABŞ-ni razı salmaq üçün öz ticarət qaydalarını yumşaltmayacaq.
Bu arada, Yaponiya hökuməti ABŞ-nin idxal rüsumları tətbiq etməsini "son dərəcə təəssüf doğuran" bir addım kimi qiymətləndirib və onların yenidən nəzərdən keçirilməsində israr edəcəyini bəyan edib. Bu barədə Yaponiya Nazirlər Kabinetinin baş katibi Yoşimasa Hayasi bəyanatla çıxış edib. Onun sözlərinə görə, Vaşinqtonun bu gedişi ölkə arasındakı iqtisadi əlaqələrə və ümumilikdə beynəlxalq ticarət sisteminə təsir göstərəcək.
Vaşinqtonun sərt gömrük siyasətinə Avropa Birliyindən də reaksiya gəlib. Avropa Komissiyasının rəhbəri Ursula fon der Lyayen Ağ Ev rəhbəri Donald Trampı 10 faizlik rüsumlarla bağlı qərarını ləğv etməyə və danışıqlara başlamağa çağırıb.
“Mən Prezident Trampın qərarına görə dərin təəssüf hissi keçirirəm. Dünya iqtisadiyyatı ciddi əziyyət çəkəcək, nəticələr bütün ölkələr üçün fəlakətli olacaq və ən həssas təbəqələrə ağır zərbə vuracaq”, - deyə o bildirib.