...

IDEA və ICESCO birgə beynəlxalq təcrübə proqramı elan edib

Cəmiyyət Materials 2 Aprel 2025 14:20 (UTC +04:00)
IDEA və ICESCO birgə beynəlxalq təcrübə proqramı elan edib

Bakı. Trend:

IDEA (Ətraf Mühitin Mühafizəsi Naminə Beynəlxalq Dialoq) İctimai Birliyi və İslam Dünyası Təhsil, Elm və Mədəniyyət Təşkilatı (ICESCO) arasında imzalanmış Anlaşma Memorandumundan irəli gələrək, Mərakeşin paytaxtı Rabat şəhərində yerləşən ICESCO-nun baş qərargahında gənclər üçün 10 həftəlik beynəlxalq təcrübə proqramı elan edilir.

Təcrübə proqramı çərçivəsində bütün seçim mərhələlərini uğurla keçəcək iki iştirakçı ICESCO-nun ətraf mühit, sosial və humanitar elmlər istiqamətləri üzrə fəaliyyət göstərən bölmələrində beynəlxalq mütəxəssislərlə birgə çalışaraq dəyərli təcrübə qazanmaq imkanı əldə edəcəklər. ICESCO-da təcrübə müddətində gənclər təşkilatın işi ilə, həmçinin İslam ölkələrinin dünya elmi və mədəniyyətinə töhfəsi ilə yaxından tanış olacaq, təşkilatın müvafiq bölmələrinin gündəlik fəaliyyətinin aparılmasına, sözügedən sahədə beynəlxalq əməkdaşlıqların qurulmasına və eyni zamanda ICESCO tərəfindən həyata keçirilən mühüm layihələrin icrasına öz töhfələrini verəcəklər.

Seçilmiş iştirakçıların səyahət, yaşayış və digər müvafiq xərcləri IDEA tərəfindən qarşılanacaqdır.

Təcrübə proqramı təşkilatın işçi dili olan ingilis dilində keçiriləcəkdir.

Seçim meyarları aşağıdakılardır:

Yaş: 18-29;

Müvafiq sahələr üzrə təhsil alan tələbə və məzunlar (bakalavr, magistr və ya doktorantura pillələri);

Dil bilikləri: ingilis (ICESCO-nun digər işçi dilləri üzrə biliklər üstünlük hesab olunacaqdır);

Son müraciət tarixi: 15 aprel 2025-ci il.

Qeyd edək ki, ICESCO üzv dövlətlər arasında müxtəlif sahələr üzrə əməkdaşlığı, bilik və təcrübə mübadiləsini, eləcə də humanitar dialoqu təşviq edən beynəlxalq hökumətlərarası təşkilatdır. 1979-cu ildə əsası qoyulmuş bu qurum İslam dünyasının zəngin mədəni irsinin qorunması və dünya miqyasında tanıdılması üçün müxtəlif proqramlar və təşəbbüslər həyata keçirir.

Ətraflı məlumat və müraciət üçün: https://forms.gle/NAXfPQAjobDq7ZwF6

Xəbər lenti

Xəbər lenti