Bakı. Trend:
Dini Qurumlarla İş üzrə Dövlət Komitəsinin (DQİDK) tabeliyində fəaliyyət göstərən Azərbaycan İlahiyyat İnstitutu (Aİİ) və Mənəvi Dəyərlərin Təbliği Fondunun (MDTF) birgə təşkilatçılığı ilə 22-23 oktyabr 2025-ci il tarixlərində Bakı şəhərində “Müasir din təhsili modelləri ənənələr və qlobal çağırışlar kontekstində” mövzusunda beynəlxalq simpozium keçiriləcək.
Bu barədə Trend-ə DQİDK-dən məlumat verilib.
Bildirilib ki, simpoziumun məqsədi Azərbaycanda və dünyada din təhsili sahəsində mövcud vəziyyətin müzakirəsi, qarşıya çıxan problemlərin təhlili, onların həlli ilə bağlı təkliflərin irəli sürülməsinin təmin edilməsi, bu istiqamətdə fəaliyyət göstərən alim və mütəxəssislər arasında tədqiqat işləri, məlumat və təcrübə mübadiləsi üçün platforma yaradılmasıdır.
Simpoziumun mövzuları aşağıdakılar olacaq:
1. Din təhsili: tarix, ənənə və müasirlik
2. Dünyəvi dövlətdə din təhsili
3. Din təhsili, tolerantlıq və multikulturalizm
4. Din təhsili və əxlaqi dəyərlər
5. Din təhsili modelləri
6. Din təhsilinə müxtəlif yanaşmalar
7. Din təhsilinin konstitusional və hüquqi əsasları
8. Din təhsili və ictimai inkişaf
9. Postsovet məkanında din təhsili problemləri və perspektivlər
10. Azərbaycanda dövlət-din münasibətlərinin tənzimlənməsində Ulu
Öndər Heydər Əliyevin rolu
11. Prezident İlham Əliyev və Azərbaycanda din təhsili
12. Dini savadsızlığın yaranma səbəbləri, doğurduğu fəsadlar (dini
fanatizm, xurafat, radikalizm, ekstremizm) və onlarla mübarizə
üsulları
13. Ənənəvi və yeni mediada din təhsili
14. Süni intellekt və din təhsili
15. Formal təhsildə, ailədə və ibadət yerlərində din təhsili
16. Sosial xidmət sahələrində din təhsili