Bakı. Trend:
2025-ci ilin yaz sərgi mövsümünə 13-16 may tarixlərində regionun ən böyük beynəlxalq kənd təsərrüfatı və qida sənayesi tədbirləri olan 18-ci Azərbaycan Beynəlxalq Kənd Təsərrüfatı “Caspian Agro” və 30-cu Yubiley Azərbaycan Beynəlxalq Qida Sənayesi “InterFood Azerbaijan” sərgiləri start verəcək.
Trend xəbər verir ki, “Caspian Agro” sərgisinə Azərbaycan Respublikası Kənd Təsərrüfatı Nazirliyi təşkilati dəstək göstərir.
Bundan başqa, Azərbaycan Respublikasının Qida Təhlükəsizliyi Agentliyi (AQTA), Azərbaycan Respublikasının Kiçik və Orta Biznesin İnkişafı Agentliyi (KOBİA), Azərbaycan Respublikasının İxracın və İnvestisiyaların Təşviqi Agentliyi (AZPROMO), Azərbaycan Respublikası Sahibkarlar (İşəgötürənlər) Təşkilatları Milli Konfederasiyası (ASK), Azərbaycan Qida və İçki Sənayeçiləri Assosiasiyası (AQİSA), BMT-nin Ərzaq və Kənd Təsərrüfatı Təşkilatı (FAO) və Azərbaycan Sərgi Təşkilatçıları Assosiasiyası (ASTA) “Caspian Agro” və “InterFood Azerbaijan” sərgilərini fəal şəkildə dəstəkləyirlər.
2024-cü ildə bu tədbirlər rekord sayda iştirakçı auditoriyasına sahib olub. Belə ki, “Caspian Agro” və “InterFood Azerbaijan” ötən il Bakı Ekspo Mərkəzinin mümkün 4 zalını və açıq sahəsini əhatə edib. Sərgilər 13000-ə yaxın ziyarətçini və ümumilikdə 38 ölkədən 500-ə qədər şirkəti bir araya gətirib. Ötən illərlə müqayisədə sərgilərin miqyasında 10% artım müşahidə olunub.
Bu il də Bakı Ekspo Mərkəzində əksər yerlər müxtəlif ölkələri təmsil edən sərgi iştirakçıları tərəfindən tutulmuşdur. Beləliklə, sərgilərdə iştirak üçün məhdud sayda yerlər qalıb.
Hazırda “Caspian Agro” və “InterFood Azerbaijan” sərgilərində Azərbaycanla yanaşı, ABŞ, Almaniya, Belarus, Belçika, Çin, Cənubi Koreya, Fələstin, Finlandiya, Fransa, Hindistan, İordaniya, İran, İtaliya, Latviya, Misir, Niderland, Özbəkistan, Rusiya, Şri Lanka, Türkiyə, Türkmənistan və Yunanıstan şirkətləri artıq iştiraklarını təsdiq ediblər. Almaniya, Belarus, Gürcüstan, İtaliya, Koreya, Niderland, Şri-Lanka, eləcə də ilk dəfə olaraq Hindistan və Misir milli qruplar şəklində kənd təsərrüfatı və qida sənayesi məhsullarını sərgilərdə təqdim edəcək. “Prior Leasing ASC” bu sərginin qeydiyyat sponsoru qismində çıxış edəcəkdir.
“Caspian Agro” regionun ən böyük kənd təsərrüfatı sərgisidir. Aqrar-sənaye sektoru iqtisadiyyatın sürətlə inkişaf edən və böyük perspektivləri olan sahəsidir. “Caspian Agro” yenidən kənd təsərrüfatı sənayesinin aparıcı iştirakçılarını, yerli və xarici ekspertləri, o cümlədən idxalçılar, ixracatçılar, kənd təsərrüfatı məhsullarının distribütorları, topdan və pərakəndə ticarət nümayəndələri, həmçinin fermerlər də daxil olmaqla minlərlə peşəkar ziyarətçi auditoriyasını bir araya toplayacaq.
Sərgi günlərində Azərbaycan Respublikası Kənd Təsərrüfatı Nazirliyinin təşkilatçılığı ilə Beynəlxalq Aqrar İnnovasiyalar Forumu keçiriləcəkdir. Forumda kənd təsərrüfatı sahəsinə aid vacib mövzulara toxunulacaqdır. Artıq ikinci ildir ardıcıl təşkil edilən forumda dayanıqlı kənd təsərrüfatının inkişafı, beynəlxalq əməkdaşlıq, kənd təsərrüfatında innovativ həllər və digər mövzuların müzakirəsi planlaşdırılır.
Hər il təşkilatçılar Azərbaycanın müxtəlif regionlarından gələn fermerlər üçün sərgi üzrə turlar təşkil edirlər və bu il də sərgilər çərçivəsində fermerlər ən son sənaye yenilikləri və beynəlxalq təcrübə ilə tanış ola biləcəklər. Fermerlərin sərgiyə turlarının nəticəsi olaraq, təcrübə mübadiləsi təşviq edilir, bu da öz növbəsində istehsalın keyfiyyətinin yüksəldilməsinə və kənd yerlərində yaşayış şəraitinin yaxşılaşdırılmasına kömək edir.
2025-ci ildən etibarən Azərbaycanda beynəlxalq sərgilərin təşkilatçıları olan “Caspian Event Organisers” və “Iteca Caspian” şirkətləri Azərbaycan Respublikasının Kiçik və Orta Biznesin İnkişafı Agentliyi (KOBİA) ilə yeni istiqamətdə əməkdaşlığı genişləndirir. Belə ki, regionlardan KOB-ların Bakıda keçirilən beynəlxalq sərgilərə cəlb edilməsinə başlanılır. KOBİA-nın dəstəyi ilə ölkənin müxtəlif regionlarından KOB-lar üçün bütün sərgilərdə iştirak etmələri məqsədilə turlar təşkil olunacaq. Bu təşəbbüs KOB-ların inkişafına, böyük biznes icmasına inteqrasiyasına, yeni tərəfdaşlıq əlaqələrinin qurulmasına, sahə üzrə yeniliklərlə tanış olmasına və innovasiyaların tətbiqinə töhfə verəcək.
“Caspian Agro” sərgisi 30-cu Yubiley Azərbaycan Beynəlxalq Qida Sənayesi “InterFood Azerbaijan” ilə eyni məkanda – Bakı Ekspo Mərkəzində keçiriləcəkdir. Qida sənayesi sahəsində aparıcı beynəlxalq tədbirlərdən olan “InterFood Azerbaijan” sərgisi 2025-ci ildə 30 illik yubileyini qeyd edəcək. Bu sərgi uzun illərdir ki, qida sənayesi üzrə yerli və xarici istehsalçıları, distribütorları, topdansatış və pərakəndə ticarət nümayəndələrini, sektorun aparıcı oyunçularını bir araya gətirən əsas platformalardan biridir.
Hər il dünyanın müxtəlif ölkələrindən onlarla qida sənayesi istehsalçıları “InterFood Azerbaijan” sərgisində iştirak edərək öz məhsul və texnologiyalarını nümayiş etdirirlər. Sərgi təkcə qida və içkilərin təqdim olunduğu bir platforma deyil, həm də sənayedə ən son texnoloji yeniliklərin tanıdıldığı mühüm məkandır. Burada qida emalı texnologiyaları, qablaşdırma həlləri, sağlam qida və ekoloji təmiz məhsullar kimi sahələrdə ən yeni trendlərlə tanış olmaq mümkündür.
Azərbaycanın qida sənayesi sürətlə inkişaf edir və “InterFood Azerbaijan” bu prosesdə mühüm rol oynayır. Sərgi sayəsində yerli istehsalçılar beynəlxalq bazara çıxış imkanı əldə edir, xarici şirkətlər isə Azərbaycan bazarına sərmayə qoymağa daha çox maraq göstərirlər. Bu isə ölkənin ərzaq təhlükəsizliyi və ixrac potensialının gücləndirilməsinə xidmət edir.
Bu sərginin tədbirlər proqramı çərçivəsində təşkilatçıların dəstəyi ilə ənənəvi "Qızıl Şah 2025" Milli Kulinariya Çempionatı keçiriləcəkdir. Sayca 5-ci olan çempionatın təşkilatçısı Azərbaycan Kulinariya Mütəxəssisləri Assosiasiyasıdır. Bu il çempionat “Halal Food”a həsr olunacaq və Bakı Ekspo Mərkəzinin 3-cü zalında keçiriləcəkdir.
“Qızıl Şah” Çempionatı Ümumdünya Kulinariya Cəmiyyətləri Birliyinin (“Worldchefs”) tərəfindən lisenziyalaşdırılmış tədbirdir və beynəlxalq norma və qaydalara uyğun keçirilir. 2024-cü ildən etibarən “Qızıl Şah” Çempionatı beynəlxalq komandaları qəbul etmək hüququna malikdir və “Worldchefs”in Kontinental Çempionatı statusunu almışdır. Çempionat çərçivəsində Azərbaycan, Qazaxıstan, Qırğızıstan, Malayziya, Rusiya, Sinqapur, Türkiyə və Özbəkistanı təmsil edən aşbazlardan ibarət 8 komandanın iştirakı nəzərdə tutulur. Eyni zamanda çempionatda 30-dan çox yerli komanda yarışacaq və 300-dən yuxarı aşbaz fərdi iştirakçı kimi 10-dan artıq kateqoriya üzrə mübarizə aparacaq. Çempionatın münsiflər heyəti 16 ölkədən olan Ümumdünya Kulinariya Cəmiyyətləri Birliyinin lisenziyalı aşbaz-hakimlərindən ibarət olacaqdır.
Sərgilər çərçivəsində təşkil ediləcək ənənəvi ikitərəfli işgüzar görüşlər (B2B və B2G) zamanı yerli və xarici şirkətlərin nümayəndələri üzbəüz formatda əməkdaşlıq və gələcək tərəfdaşlıq yollarını müzakirə edə biləcəklər. Bundan əlavə, ikitərəfli işgüzar görüşlər çərçivəsində özəl şirkətlərin nümayəndələri dövlət qurumlarının təmsilçiləri ilə görüş imkanı əldə edəcəklər.
“Caspian Agro” və “InterFood Azerbaijan” sərgiləri kənd təsərrüfatı və qida sənayesi sahələrində ən vacib platformalardan biri olaraq, regionun əsas istehsalçı və distribyutorları ilə birbaşa əlaqə qurmaq fürsəti yaradacaq, şirkətlər məhsul və xidmətlərini potensial müştərilərə və tərəfdaşlara nümayiş etdirmək şansı əldə edəcəklər, həmçinin iştirakçılar müvafiq sənaye sahələrində olan ən son texnologiyalar və trendlərlə tanış olmaq imkanı qazanacaqlar.
Ən başlıcası isə bu tədbirlər Azərbaycanın kənd təsərrüfatı və qida sənayesinin inkişafına dəstək verərək, ölkənin ixrac potensialının artırılması, xarici investisiyaları cəlb edilməsinə imkan yaradacaq, eyni zamanda qida təhlükəsizliyi və innovativ həllərin tətbiqi üçün əlverişli platforma rolunu oynayacaq.