Bakı. Trend:
Aprel döyüşləri Ermənistan tərəfinin öncədən planlaşdırılmış təxribatının bir hissəsi idi.
Bunu Trend-ə açıqlamasında hərbi ekspert Azər Bayramov deyib.
O qeyd edib ki, Birinci Qarabağ müharibəsindən sonra düşmənin ən geniş təxribatı 2016-cı ilin aprelində baş verdi.
"Lakin Azərbaycan Ordusunun qəhrəmanlığı və qətiyyəti nəticəsində bu təxribatın qarşısı alındı. Həyata keçirilmiş əks-həmlə əməliyyatında ordumuzun əsas hədəfi ozamankı Azərbaycan-Ermənistan qoşunlarının təmas xəttindəki kəndlərdə yaşayan azərbaycanlı əhalinin təhlükəsizliyini təmin etmək və qarşı tərəfin atəşinə məruz qalan dinc vətəndaşların təhlükəsizliyinin tam şəkildə təmin edilməsi, erməni terrorçuçularının atəş nöqtələrinin zərərsizləşdirilməsi oldu.
Ordumuz qarşısına qoyulan tapşırıqların öhdəsindən layiqincə gəldi. Eyni zamanda, uzun müddətdən sonra Ermənistan ordusunun formalaşdırdığı mif darmadağın edildi. Ermənistan ordusunu döyüş meydanında məğlub edərək öz gücünü bir daha sübut etdi.
Aprel döyüşləri İkinci Qarabağ müharibəsində əsas zəfərə aparan yolun təməlini qoydu. Orada qazanılmış döyüş təcrübəsi İkinci Qarabağ müharibəsində Azərbaycan Ordusuna ciddi şəkildə üstünlüklər yaratdı".
Politoloq Rüfət Hüseyn Trend-ə açıqlamasında bildirib ki, bu döyüşlər Azərbaycan ordusunun mühüm zəfəri ilə yadda qalıb.
"Ordumuz bu döyüşlərdə strateji üstünlük əldə edərək, bir sıra mühüm mövqeləri geri ala bilmişdi. Döyüşlərdə, həmçinin, çox sayda erməni hərbçisi məhv edilmişdi. Azərbaycanın qazandığı zəfər, yalnız hərbi baxımdan deyil, həm də beynəlxalq aləmdə ölkənin mövqeyini gücləndirdi.
Aprel döyüşləri, həmçinin, Ermənistanın münaqişənin həlli ilə bağlı təcavüzkar siyasətinin iflasını bir daha ortaya qoydu. Aprel döyüşlərindəki zəfər, Azərbaycan ordusunun döyüş hazırlığının və peşəkarlığının yüksək səviyyədə olduğunu göstərdi və Azərbaycanın müharibə aparma qabiliyyətini nümayiş etdirdi. Bu zəfər, Azərbaycan xalqı və ordu üçün bir qürur mənbəyi oldu və xüsusilə Qarabağ münaqişəsinin həlli baxımından əhəmiyyətli bir addım hesab edilir", - deyə o qeyd edib.
Qeyd edək ki, bu gün Azərbaycan Ordusunun aprel qələbələrindən 9 il ötür.
2016-cı il aprelin 1-dən 2-nə keçən gecə və gün ərzində bütün cəbhə boyu Azərbaycan mövqeləri və yaşayış məntəqələri Ermənistan silahlı qüvvələri tərəfindən güclü artilleriya atəşinə məruz qaldı. Azərbaycanın qarşıdurma xəttinə yaxın yaşayış məntəqələrinin bombalanması nəticəsində aralarında 16 yaşdan kiçik 2 uşaq olmaqla 6 mülki şəxs həlak oldu, 26 şəxs ağır yaralandı. Hücumlar nəticəsində, həmçinin çoxsaylı ictimai və şəxsi mülkiyyətə, o cümlədən mülki infrastrukturlara ciddi ziyan dəydi. 232 fərdi yaşayış evi, 99 elektrik dirəyi, 3 elektrik yarımstansiyası, kilometrlərlə su və qaz boruları dağıdıldı. Məktəblər, xəstəxanalar və ibadət yerləri də daxil olmaqla sosial müəssisələrə Ermənistan silahlı qüvvələri tərəfindən idarə olunan raket zərbələri endirildi. 1 məscid ibadət zamanı yüksək kalibrli artilleriya mərmiləri ilə vuruldu.
Erməni təxribatının qarşısının alınması, mülki əhalinin təhlükəsizliyinin təmin olunması məqsədilə Azərbaycan Silahlı Qüvvələrinin komandanlığı tərəfindən Ağdərə-Tərtər-Ağdam və Xocavənd-Füzuli istiqamətində təxirəsalınmaz cavab tədbirlərinin keçirilməsi barədə qərar qəbul edildi.
Nəticədə dördgünlük döyüşlər zamanı Azərbaycan Silahlı Qüvvələrinin birləşmələri Goranboy rayonuna və Naftalan şəhərinə təhlükə yarada biləcək Talış kəndi ətrafındakı yüksəkliklərini azad etdi, Füzuli rayonu istiqamətində yerləşən, geniş ərazini nəzarətdə saxlamaq imkanı verən strateji əhəmiyyətli Lələ Təpə yüksəkliyinə nəzarəti ələ keçirdi. Həmçinin aprel döyüşləri nəticəsində Azərbaycan Silahlı Qüvvələri Ağdərə-Madagiz istiqamətində yolların nəzarətdə saxlanılmasını təmin etdi.
Döyüşlərdə ermənilərə məxsus 30 tank, 15-dək artilleriya qurğusu və möhkəmləndirilmiş mühəndis qurğuları məhv edildi, düşmənin 320 hərbçisi öldürüldü, 500-dən artıq hərbçisi isə yaralandı.
Aprelin 5-də saat 12:00-dan etibarən Azərbaycan və Ermənistan qoşunlarının qarşıdurma xəttində tərəflərin razılığı ilə əməliyyatlar dayandırıldı.
Döyüşlərin yekunu olaraq Silahlı Qüvvələrimiz tərəfindən 2000 hektardan artıq ərazi erməni işğalından azad edildi və daha çox ərazi əməliyyat baxımından nəzarətimiz altına keçdi. Azərbaycan Silahlı Qüvvələrinin bölmələri azad edilmiş torpaqlarda möhkəmləndirmə işləri həyata keçirdi.