Bakı. Trend:
3 və 4 iyun tarixlərində Bakı Konqres Mərkəzində “Baku Energy Week”in əsas hadisəsi olan “Baku Energy Forum” (Bakı Enerji Forumu) baş tutacaq.
Trend xəbər verir ki, bu il 30 illik yubileyini qeyd edən Forum “Baku Energy Week”in əsas iştirakçılarını, aparıcı dünya mütəxəssislərini, dövlət qurumlarının və özəl sektorun nümayəndələrini, investorları və biznes nümayəndələrini strateji dialoq üçün bir araya gətirir. Burada enerji sənayesinin gələcək gündəliyi formalaşır, strateji təşəbbüslər və inkişafın əsas tendensiyaları müzakirə edilir. Bu il “Baku Energy Forum”un əsas mövzuları dayanıqlı enerji sənayesinin inkişafı, enerji sektorunun rəqəmsallaşdırılması, yaşıl enerji layihələrinin sürətləndirilməsi və dekarbonizasiya üçün innovativ həllərin araşdırılmasıdır. Bu müzakirələr qlobal enerji sektorunun transformasiyasına istiqamət verərək onun gələcəyini müəyyənləşdirməkdə mühüm rol oynayacaq.
Tədbir çərçivəsində “Zero Waste” və “Zero Food Waste” təşəbbüsləri həyata keçirilir ki, bu da təşkilatçıların dayanıqlı inkişaf prinsiplərinə sadiqliyini vurğulayır.
Enerji sahəsinin vacib məsələlərinin müzakirə olunduğu və uğurlu əməkdaşlıqların başlanğıcı olan “Baku Energy Week” çox sayda sponsorları cəlb edir. Hazırda Bakı Enerji Həftəsinin sponsorları arasında “ABB”, “Azfen”, “Baku Steel Company”, “bp”, “GAP İnşaat”, “Inpex”, “Kolin İnşaat”, “MOL Group”, “MVM”, “NewMed Energy”, “SLB”, “Tekfen İnşaat ve Tesisat”, “Total Energies”, “Türkiye Petrolleri AO” yer alır. Bu tədbirin intellektual tərəfdaşı “Boston Consulting Group”dur. Bakı Enerji Həftəsinin konsaltinq üzrə tərəfdaşı isə “Deloitte” şirkətidir.