Bakı. Trend:
"Malvertising" zərərverici proqramlarla təchiz olunmuş reklamların veb-saytların daxilində yerləşdirilməsidir.
Trend Elektron Təhlükəsizlik Xidmətinin (ETX) yaydığı məlumata istinadən xəbər verir ki, bu üsul kiberdələduzlar tərəfindən geniş istifadə olunur, çünki bunu aşkar etmək çətindir və çox vaxt diqqətdən kənarda qalır.
Qeyd edilib ki, zərərli proqramlar, adətən, onlayn reklamlara yerləşdirilir və istifadəçilər axtarış etdikləri zamanı qarşısına çıxır.
Vurğulanıb ki, kiberdələduzlar daha geniş auditoriyaya çatmaq üçün bu reklamları tanınmış veb-saytlarda da yerləşdirə bilərlər.
"Bəzi veb-saytlarda "Bir kliklə hədiyyə qazan!", "Kompüteriniz virusa yoluxub!" tipli "malvertising" nümunələri ilə qarşılaşa bilərsiniz. Odur ki, bu kimi hallara qarşı diqqətli olun", - qurumdan bildirilib.