Azərbaycan, Bakı, 03 fevral / Trend , müxbir C.Babayeva/ Azərbaycanda keçiriləcək referendum zamanı istifadə olunacaq gözlə görünməyən mürəkkəb və ultra-bənövşəyi dedektorlar (lampalar) Danimarkadan sifariş olunacaq.
"Seçki ləvazimatları Mərkəzi Seçki Komissiyasının etibar etdiyi Danimarka şirkətlərinin birində sifariş olunacaq. Hazırda nə qədər şəffaf mürəkkəb və ultrabənövşəyi lampaların lazım olacağı müəyyənləşdirilir", - çərşənbə axşamı Trend -a Mərkəzi Seçki Komissiyasının Beynəlxalq əlaqələr şöbəsinin müdiri Rövzət Qasımov bildirib.
Trend -un arayışı: Azərbaycanın Seçki Məcəlləsinin 102-ci maddəsinə əsasən, seçki günü bülleten alarkən seçicinin barmağı mürəkkəbə batırılır. Seçicinin barmağının mürəkkəbə batırılıb-batırılmamasını müəyyən etmək üçün ultrabənövşəyi lampadan istifadə olunur. Bu üsul bir şəxsin ikinci dəfə səsverməsinin qarşısını almaq üçün tətbiq olunur.
Azərbaycanda keçirilmiş parlament və prezident seçkilərində seçicilərin barmaqlarına mürəkkəb vurulub.
Martın 18-də Azərbaycanda Konstitusiyanın 29-cu maddəsinə əlavə və dəyişikliklərin edilməsi məsələsi üzrə referendum keçiriləcək.
MSK-ya referendum üzrə imza vərəqələrini təhvil verən təşəbbüs qruplarının sayı 13-dür.
Hakim Yeni Azərbaycan Partiyasının referendum üzrə "Yeni Azərbaycan", "Şəhər" və "Tərəqqi" təşəbbüs qrupları MSK-da təbliğat qrupları kimi qeydiyyata alınıblar. "Abad kənd" təşəbbüs qrupu qeydə alınmayıb.
Dairə seçki komissiyalarında 113 təşəbbüs qrupu qeydiyyata alınıb.
Azərbaycan Konstitusiyası 1995-ci ildə qəbul edilib, 2002-ci ildə Əsas Qanuna əlavə və dəyişikliklər edilib.
Məqalə müəllifi ilə əlaqə ünvanı: [email protected]
