Azərbaycan, Bakı, 19 dekabr /Trend, müxbir E.İsmayılov/
Azərbaycan Nəqliyyat Nazirliyi artıq Tarif Şurasına uzaq hərəkət marşrutlarına malik şəhərdaxili sərnişin avtobuslarında gedişhaqqının artırılmasına dair təklif təqdim edib. Bu barədə bazar ertəsi Trend-ə Nəqliyyat Nazirliyindəki mənbə məlumat verib.
Mənbənin sözlərinə görə, şəhərdaxili avtobuslarda gedişin baza dəyəri 0,2 manat səviyyəsindədir. Tariflərin dəyişdirilməsi uzaq məsafəyə, o cümlədən Bakının ətraf qəsəbələrinə gedən avtobuslarda nəzərdə tutulur.
"Bu marşrutlarda gediş haqqı məsafədən asılı olaraq fərqli olmalıdır", - mənbə bildirib.
Onun sözlərinə görə, Nəqliyyat Nazirliyi Tarif Şurasına şəhərlərarası sərnişin avtobuslarında da tariflərin dəyişdirilməsi ilə bağlı müraciət etmək imkanlarına baxır. "Lakin bu məsələ baxılma mərhələsindədir", - mənbə deyib.
O bildirib ki, şəhərdaxili şərnişin avtobuslarında tariflərin artırılması çox güman ki, gələn il baş verəcək.
Dekabrın 19-na rəsmi məzənnə 0,7864 AZN/USD təşkil edir.
