Azərbaycan, Bakı, 06 fevral / Trend , müxbir İ.Xəlilova / Fevralın 13-də Azərbaycanın investisiya imkanlarının təqdim olunması üçün Küveytdə investisiya forumu baş tutacaq, çərşənbə günü Azərbaycanın İnvestisiyalar və İxracatın Təşviqi Fondundan (AZPROMO) bildiriblər. Bu tədbirdə təmsil olunacaq Azərbaycan nümayəndə heyətinə AZPROMO prezidenti Emil Məcidov və Fondun Müşahidə Şurasının sədri Çingiz Əsədullayev başçılıq edəcək.
Fonddan qeyd edilib ki, Küveyt iş adamları arasında tərəfdaş axtarmaqda maraqlı olan şirkətlərin siyahısı artıq hazırlanıb. Cəmi altı şirkət var və onlar istehsal, tikinti və mühəndislik sahələrini təmsil edirlər. Azərbaycan həmçinin tikinti biznesi və aqrobiotexnologiya üzrə təqdimat keçirməyi planlaşdırır.
Seminar çərçivəsində Küveytin Ticarət Palatası ilə Dəyirmi masanın keçirilməsi də gözlənilir.
