Seçkilərdə iştirak etməyən və qalib gəlməyən partiyalar deməli mövcud deyillər. Bu barədə Trend ə Ana Vətən Partiyasının sədri, millət vəkili Fəzail Ağamalı "Siyasi partiyalar haqqında" qanun layihəsinin yenidən hazırlanmasına münasibət bildirərkən qeyd edib.
Millət vəkili bildirib ki, adıçəkilən qanun layihəsində müəyyən qədər boşluqlar var: "1992-ci ildə qəbul edilən bu qanun demək olar ki, yenidən hazırlanmalıdır. Çünki, bu zaman kəsiyində cəmiyyətdə inkişaf, tərəqqi hiss olunub. Sənəd bu tərəqiyyə uyğunlaşdırılmalıdır". Partiya sədri onu da qeyd edib ki, Azərbaycanda xaotik vəziyyət törədən siyasi partiyalar haqqında da cəmiyyətdə normal rəy formalaşdırılmalıdır: "Bir papkası, bir özü olan partiya sədrləri meydana çıxıb "mən də varam" deyə özlərini cəmiyyətə təqdim etməsinlər. O partiyalar ki, seçkilərdə iştirak etmirlər, o, partiyalar ki, seçkilərdə qalib gəlmirlər, deməli, onlar mövcud deyillər. Ona görə də ölkədə demokratik cəmiyyətin qurulmasında siyasi partiyların rolunu gücləndirə bilən bir qanunun hazırlanması vacibdir".
AVP sədri onu da qeyd edib ki, Milli Məclisin payız sessiyasında "Siyasi partiyalar haqqında" qanun layihəsinin müzakirəsi zamanı onlar da öz təkliflərini verəcəklər.
