Azərbaycan, Bakı, 25 oktyabr /Trend, müxbir E.İsmayılov/
ARDNŞ-nin "Azəriqaz" İstehsalat Birliyi (İB) tələb olunan istehlak həcmlərindən asılı olaraq öz abonentlərini qazla təmin edir. Bu barədə cümə günü Trend-ə İB-dən məlumat veriblər.
İB-dən deyiblər ki, istehlakçılara qazın çatdırılmasında problem yoxdur və "Azəriqaz" mövsümdən asılı olmayaraq, abonentləri bütün zəruri qaz həcmləri ilə təmin etməyə hazırdır: "Ölkədə qazın verilişi faktiki olaraq hava şəraiti ilə müəyyənləşir, yəni payız-qış mövsümündə qaz istehlakı artır və müvafiq olaraq, tələbatın çoxalması ilə abonentlərə qazın verilişi artır".
İB-nin payız-qış mövsümü ilə əlaqədar texniki hazırlığına gəlincə, "Azəriqaz"dan qeyd ediblər ki, qaz nəqli infrastrukturunun və bütün zəruri avadanlığın hazırlanması üzrə işlər davam edir və bu il noyabrın 15-də tam başa çatacaq.
İB ölkə ərazisində qazın verilişində vaxtaşırı fasilələrin yaranması məsələsinə də aydınlıq gətirib: "Bakı və respublikanın rayonlarında qazın verilişində məhdudiyyətlər bütün ölkə ərazisində qazlaşdırmanın səviyyəsinin artırılması və qaz təchizatının yaxşılaşdırılması üzrə aparılan işlərlə əlaqədardır. 2013-cü ilin yekunlarına əsasən, ölkə üzrə qazlaşdırmanın səviyyəsini 90 faizə çatdırmaq planlaşdırılır".
