Azərbaycan, Bakı, 19 fevral / Trend , müxbir Q.Cəbiyev/ 50-dən artıq qeyri-hökumət təşkilatlarını özündə birləşdirən Azərbaycanda Vətəndaş Cəmiyyətinin İnkişafına Yardım Assosiasiyası (AVCİYA) oktyabrda ölkədə keçiriləcək prezident seçkisinin monitorinqini həyata keçirəcək. Bu barədə çərşənbə axşamı Trend ə AVCİYA-nın Seçki Qərargahının rəhbəri Məhərrəm Zülfüqarlı məlumat verib.
AVCİYA 2005-ci il parlament seçkilərində monitorinq aparmışdı, öz xarici tərəfdaşları ilə birgə "exit-poll" keçirmişdi.
Zülfüqarlı deyib ki, təmsil etdiyi qurum İFES, ATƏT-in Bakı ofisi, ABŞ-ın Respublikaçılar İnstitutu, Avrasiya Əməkdaşlıq Fondu ilə bu istiqamətdə iş aparır. "Biz beynəlxalq qurumların köməyilə monitorinqlərin keçirilməsi üçün treninqlər keçirəcəyik. Treninqdə iştirak edən şəxslər seçkiləri müşahidə edəcəklər" -Zülfüqarlı əlavə edib.
