Bakı. Trend:
Oyunun mahiyyəti bəllidir. Bizim üçün çox vacib matçlardan biridir. Hesabda geridə olsaq da, əlimizdən gələni edəcəyik.
Trend İdman.biz-ə istinadən xəbər verir ki, bunu “Qarabağ”ın baş məşqçisi Qurban Qurbanov deyib.
52 yaşlı mütəxəssis Çempionlar Liqasının pley-off mərhələsinin Zaqreb “Dinamo”su ilə sabah keçiriləcək cavab oyununa həsr olunan mətbuat konfransında fikirlərini açıqlayıb:
“Komanda pis hazırlaşmayıb. İnamımız böyükdür. Qalibiyyət üçün əlimizdən gələni etməyə çalışacağıq. Rəqibi tanıyırıq. Ambisiyalı komandadır. Görünür ki, onların üstünlüyü bizdən çoxdur. Sabah yaxşı nəticə əldə etmək üçün hər futbolçu karyerasının ən yaxşı oyununu oynamalıdır. Futbolçularımdan da bunu gözləyirəm".
Qeyd edək ki, Tofiq Bəhramov adına Respublika stadionunda keçiriləcək “Qarabağ” – “Dinamo” matçı saat 20:45-də başlayacaq.