Azərbaycan, Bakı, 09 sentyabr / Trend , müxbir Ü.İsmayılova /
Azərbaycan Dövlət Sosial Müdafiə Fondu sosial sığortalanmış şəxslər barədə avtomatlaşdırılmış informasiya qəbuluna başlayıb. Bu barədə çərşənbə günü fondun sədr müavini Elman Mehdiyev deyib.
"Əvvəllər Azərbaycan müəssisələri öz maliyyə hesabatlarında sosial fonda ümumi tutulmalar barədə məlumat verirdilərsə, yeni sistemə əsasən, təşkilatın hər əməkdaşı barədə fərdi qaydada ödəmələr üzrə məlumat veriləcək", - Mehdiyev deyib.
Onun sözlərinə görə, əslində pensiya təminatı sistemində islahatların keçirilməsi ondan ibarətdir ki, hər bir vətəndaşın gələcək pensiya təminatı üzrə sığorta ödəmələrinin yığımı üçün öz fərdi hesabı olsun.
Mehdiyev deyib ki, sosial-pensiya sistemində islahatlar çərçivəsində Dövlət Fondu tərəfindən demək olar ki, bütün işləyən şəxslərin fərdi sığorta vəsiqələri ilə təminatı başa çatdırılıb və bu gün sosial fondun əsas məqsədi sosial sığorta üzrə məcburi tutulmaların registrasiyasıdır.
"Bu sistemin avtomatlaşdırılmasında əsas məqsəd prosesə bütün işəgötürənlərin və işçilərin cəlb edilməsidir, çünki hər işgüzar şəxs üzrə sosial ödəmələrin qəbulu həm də ictimai nəzarətlə təmin ediləcək", - Mehdiyev deyib.
"Dövlət Sosial Müdafiə Fondu işçilərin sosial sığorta ilə təmin olunmuş 740 iri müəssisədə sosial sığortalanmış şəxslər barədə avtomatlaşdırılmış məlumatların pilot qəbulunu keçirib. Bu da bütün iri sığortaçıların təxminən 50 faizini, Bakı üzrə iri sığortaçıların isə 30 faizini təşkil edir", - fondun fərdi uçotun təşkili şöbəsinin müdiri Şəlalə Cəfərova prezentasiya zamanı deyib.
Ümumilikdə, Azərbaycanda fərdi uçot sistemində qeydiyyatdan keçmiş sosial sığortalanmış şəxslərin sayı 1,586 milyon nəfərdir. Onlardan 866,48 min nəfəri kişi, 720,25 min nəfəri isə qadındır. Yanvar-avqustda bu sistem üzrə 95,38 min nəfər qeydə alınıb.
Fərdi uçot sistemində əsasən 40-50 yaşlı 441,56 min nəfərdən çox, 30 yaşadək 376 min nəfər, 30-40 yaşlı 354 min nəfər, 50-60 yaşlı 294 min nəfər, 60 yaşdan yuxarı 119 min nəfər şəxs qeydə alınıb.
Fərdi uçot ölkə qanunvericiliyinə müvafiq olaraq, pensiya və digər sosial müdafiə hüquqlarının təminatı üçün hər bir sığortalanmış şəxs barədə məlumatların uçotunun təşkili və aparılmasıdır.
"Dövlət sosial sığorta sistemində fərdi uçot haqqında" qanunun tətbiq edilməsi barədə Azərbaycan Prezidentinin fərmanı 2001-ci ilin dekabrında imzalanıb.
Məqalə müəllifi ilə əlaqə ünvanı: [email protected]
