Azərbaycan, Bakı, 11 oktyabr /Trend, müxbir N.İsmayılova/
Azərbaycan bankı "RoyalBank" ölkədə ipoteka kreditləşməsi bərpa ediləndən sonra Azərbaycan Mərkəzi Bankı yanında fəaliyyət göstərən Azərbaycan İpoteka Fondunun (AİF) xətti ilə 10,668 milyon manat məbləğində 255 ipoteka krediti verib. Bu barədə bazar ertəsi bankdan bildirilib.
"Bu günədək bank 9,3 milyon manat məbləğində 213 standart ipoteka krediti, eləcə də güzəştli şərtlərlə 1,4 milyon manat məbləğində 42 kredit verib", - bankdan deyiblər.
Bankın ipoteka kreditinin məcmu həcmi hazırda 30 milyon manatı ötür.
İpotek kreditləşməsinin başlaması ilə əlaqədar olaraq AİF-in səlahiyyətli etdiyi 18 bank, 10 qiymətləndirmə şirkəti və 16 sığortaçı təsdiqlənib.
İpoteka kreditlərinin verilmə şərtləri bunlardır: kreditlər milli valyutada - manatla və yalnız Azərbaycan vətəndaşlarına verilməlidir; ipotekanın predmeti yalnız mənzil və şəxsi evlər ola bilər; ipoteka kreditinin məbləği ipoteka üçün girov qoyulan daşınmaz əmlakın bazar qiymətinin 85 faizini ötməməlidir; kreditə görə aylıq ödəniş borc alanın aylıq gəlirinin 70 faizini ötməməlidir.
Güzəştli şərtlər şəhid, milli qəhrəmanlar və məcburi köçkün ailələrinin üzvlərinə, ən azı üç il iş təcrübəsi olan dövlət qulluqçularına, elmlər namizədləri və doktorluq dərəcəsi olanlara, idman sahəsində xüsusi xidmətləri olan şəxslərə, həmçinin, maksimum üç il xidmət stajı olan hərbçilərə şamil edilir.
Oktyabrın 11-nə olan rəsmi məzənnə 0,8020 AZN/USD təşkil edir.