Azərbaycan, Bakı, 10 avqust /Trend, müxbir İ.Xəlilova/
KfW Almaniya İnkişaf Bankı sentyabrda əlavə maliyyələşdirməni vermək üçün Gəncə və Şəki şəhərlərində su təchizatı və kanalizasiya sistemlərinin bərpası layihəsini qiymətləndirməyi planlaşdırır. Bu barədə çərşənbə günü Trend-ə KfW-nin Bakı ofisinin rəhbəri Natiq Abdullayev məlumat verib.
"Bank bu iki şəhərdə su təchizatı və kanalizasiya sistemlərinin tam bərpası üzrə tədbirlərin davam etdirilməsi üçün daha 83 milyon avro verməyə hazırdır. Bunun 23 milyonu 2009-cu ildə, 40 milyonu 2010-cu ildə və 20 milyon avro 2011-ci ildə Almaniya hökuməti tərəfindən təsdiq edilib", - Abdullayev qeyd edib.
Layihənin birinci fazasının büdcəsi 55 milyon avro təşkil edir. 2006-cı ilin oktyabrında Berndə imzalanan sazişlərə uyğun olaraq, KfW layihənin reallaşdırılması üçün 37 milyon avro, İqtisadi Məsələlər üzrə İsveçrə Dövlət Katibliyi (SECO) qrant formasında 10 milyon avro ayırıb. Layihədə Azərbaycan hökumətinin payı 8 milyon avro təşkil edir.
Layihənin birinci fazası Şəkinin 100 faiz , Gəncənin 50 faiz su ilə təmin edilməsini nəzərdə tutur. Gəncənin su təchizatı sisteminin gələcək inkişafı ikinci fazada həyata keçiriləcək.
Abdulayevin sözlərinə görə, ikinci faza çərçivəsində işlərin maliyyələşdirilməsi üçün bank 23 milyon avro ayıracaq. Bu, layihənin sentyabrda qiymətləndirilməsindən sonra gözlənilir. 40 milyon avronun verilməsi üçün qiymətləndirmə dövrü 2011-ci ilin dekabrı müəyyənləşdirilib.
"Almaniya bankının əsas məqsədi istehlakçıların su şəbəkəsinə 100 faizlik qoşulmasıdır. Lakin Şəkidə tikinti işlərinə başlamaq üçün podratçının müəyyənləşdirilməsinin yubanması səbəbindən layihən başa çatması 2014-cü ilədək uzanacaq", - Abdullayev qeyd edib.
Onun sözlərinə görə, Gəncədə artıq tikinti işlərinə başlanılıb. İşlər Türkiyənin "Hasalsan" şirkəti tərəfindən aparılır. Şəki üçün podratçının müəyyənləşdirilməsinə görə sentyabrda tender elan edilməsi planlaşdırılır.
SECO-nun vəsaiti hesabına Şəkinin infrastrukturunun qismən bərpası və konsaltinq xidmətlərinin təmin edilməsi, eləcə də avadanlıqların alınması nəzərdə tutulur.
