Bakı. Elçin Mehdiyev - Trend:
Rusiya Liberal Demokrat Partiyasının (RLDP) lideri Vladimir Jirinovskinin Azərbaycanla bağlı dediyi fikirlərin Xocalı soyqırımının 25 illiyi ərəfəsində səslənməsi qəbuledilməzdir.
Trend-in məlumatına görə, bunu Milli Məclisin deputatı Səməd Seyidov bu gün keçirilən plenar iclasda deyib.
S.Seyidov bildirib ki, əslində bu sözlərə fikir verməmək olardı:
“Bu fikirlərin Xocalı soyqırımının 25 illiyi ərəfəsində deyilməsi qəbuledilməzdir. Azərbaycanın müstəqilliyi əbədidir, dönməzdir. Ermənistan qondarma bir dövlətdir. Ermənistan Azərbaycan torpaqlarında yaradılıb. O ərazilərin 95 faiz əhalisi azərbaycanlı olub. Əgər Yerevan rəhbərliyi istəyərsə, qoy Azərbaycanın ayrılmaz tərkib hissəsi olsun”.
Qeyd edək ki, V.Jirinovski postsovet ölkələrinin Rusiyaya birləşməsini təklif etmişdi: "Əgər SSRİ-nin keçmiş sərhədləri bərpa olunsa, Azərbaycan olmayacaq, Bakı quberniyası olacaq, Dağlıq Qarabağ münaqişəsi də öz-özünə həll olunacaq".