Bakı - Trend:
Ermənistan rəhbərliyi Dağlıq Qarabağ münaqişəsinin həllinə imkan vermir. Trend-in məlumatına görə, bu sözləri erməni jurnalist və ictimai xadim Süzan Caginyan bu gün Bakıda keçirilən mətbuat konfransında deyib.
Onun sözlərinə görə, Dağlıq Qarabağ münaqişəsi Azərbaycan və Ermənistana ağrı-acıdan başqa heç nə vermir, buna görə də münaqişə tez bir zamanda həll olunmalıdır:
“Münaqişə Ermənistan xalqına bu günədək davam edən bədbəxtlik və göz yaşı verib. Münaqişə yalnız ondan qazanc əldə edən işğalçılara sərf edir”.
Ermənistan prezidenti Serj Sarkisyanı hakimiyyətə qətllər yolu ilə gələn işğalçı və öz xalqının soyğunçusu adlandıran S.Caginyan Bakıya səfərinin Ermənistan rəhbərliyinə bir zərbə olduğunu deyib.
Onun sözlərinə görə, Azərbaycan mətbuatında fikirləri dərc olunduqdan sonra Sarkisyan öz məmurlarına onu “ölü elan etməyi” tapşırıb:
“Ermənistan rəhbərliyi mənim kimi şəxslərlə ancaq bir üsulla mübarizə aparır – qətl vasitəsilə!”
S.Caginyan onun Ermənistanda mülkiyyətinin əlindən alındığını, pasportunun müddətinin başa çatdığını və ölkə vətəndaşlığının olmadığını deyib.
Daha sonra erməni fəal deyib ki, sabah Xocalı soyqırımı qurbanlarının xatirəsinə ehtiram əlaməti olaraq Memorial Kompleksi ziyarət edəcək: “Mənim bu cür faciələrə münasibətim birmənalıdır – mən bu əməli edənləri qınayıram. Öz xalqım adından Azərbaycan xalqından üzr istəyirəm”.
