Azərbaycan, Bakı, 24 iyul /Trend, müxbir İlhamə İsabalayeva/
Avropa Azərbaycanlıları Konqresi (AAK) və Almaniyadakı Azərbaycanlıların Koordinasiya Mərkəzi (AAKM) Avropanın ictmai, siyasi və humanitar təşkilatlarına Ermənistan silahlı qüvvələrinin Azərbaycan vətəndaşları Dilqəm Əsgərov və Şahbaz Quliyevi Kəlbəcər rayonu ərazisində girov götürməsi ilə bağlı bəyanat ünvanlayıblar.
Diasporla İş üzrə Dövlət Komitəsindən Trend-ə verilən məlumata görə, müraciətdə öz doğma torpağında erməni işğalçıları tərəfindən girov götürülmüş D.Əhmədov və Ş.Quliyevin vəziyyətinin ağır olduğu bildirilir.
Adıçəkilən qurumlar bəyanatlarında beynəlxalq qurumları həmvətənlərimizin taleyinə biganə qalmamağa çağırır, erməni işğalçılarının işgəncə siyasətinə son qoymasını tələb edirlər.
Bəyanatda Kəlbəcərdəki hadisələrlə yanaşı, Dağlıq Qarabağ və yeddi ətraf rayonun ermənilər tərəfindən işğal edilməsi, bir milyondan çox qaçqın və məcburi köçkünün acınacaqlı taleyi barədə bir daha məlumat verilir.
AAK və AAKM-in vətəndaşlarımızın müdafiəsinə dair yaydığı bəyanatda ən bəsit insan hüquqlarının - Vətəndə yaşamaq hüququnun pozulmasının yolverilməzliyi vurğulanır və bu hüququn bərqərar olunması tələb olunur.