Prezident İlham Əliyev Azərbaycan və Qazaxıstan arasında imzalanmış bir sıra sənədlərin təsdiq ediməsi barədə sərəncam imzalayıb

Prezident İlham Əliyev Azərbaycan və Qazaxıstan arasında 2009-cu il oktyabrın 2-də Bakı şəhərində imzalanmış sənədlərin təsdiq ediməsi barədə sərəncam imzalayıb. Məlumatı çərşənbə günü AzərTAc Dövlət İnformasiya Agentliyi yayıb.

Sərəncama əsasən "Azərbaycan ilə Qazaxıstan hökumətləri arasında 1992-1993-cü illər ərzində (müxbir hesabları üzrə hesablaşmalara keçidə kimi və ondan sonra) ticarət-iqtisadi münasibətlər nəticəsində yaranmış borcun ödənilməsi haqqında Saziş", "Azərbaycan və Qazaxıstanın Kənd Təsərrüfatı nazirlikləri arasında kənd təsərrüfatı sahəsində əməkdaşlıq haqqında Saziş" təsdiq edilib.

Bundan əlavə sərəncamda göstərilir ki, 2009-cu il oktyabrın 2-də Bakı şəhərində imzalanmış "Sumqayıt şəhəri (Azərbaycan Respublikası) və Aktau şəhəri (Qazaxıstan Respublikası) arasında qardaşlaşmış şəhər münasibətlərinin yaradılması haqqında Birgə Bəyannamə" nəzərə alınsın.

Azərbaycan Nazirlər Kabinetinə tapşırılıb ki, bu Sərəncamın 1.1-1.2-ci bəndlərində göstərilən sənədlərin həyata keçirilməsi üçün zəruri tədbirlər görsün.

Xarici İşlər Nazirliyinə tapşırılıb ki, bu Sərəncamın 1.1-1.2-ci bəndlərində göstərilən sənədlərin qüvvəyə minməsi üçün zəruri olan dövlətdaxili prosedurların yerinə yetirilməsi barədə Qazaxıstan Respublikası tərəfini xəbərdar etsin.